Naalakkersuisut kommunip avinneqarnissaa pillugu suli misissuipput
Kommunimilli avitsitsiniarnermi isumaliutissiissummi, kommunerujussuanngortitsinermut tunngaviusumi, innersuussutigineqartoq suli unammillersitsivoq.
- Tassa akisussaaffiit assigiinngitsut aamma kommuninut aggulunneqarnissaat taamani kommunerujussuanngortitsinermi isummersorneq aamma tunngavissatut kommunerujussuanngortitsinermi oqariartuutigineqarpoq, innuttat 8000-it missaanniissapput, taamaalillutik suliassat, kommunerujussuanngortitsinermi suliakkiutigineqartut, kivissinnaassammassuk, Kim Kielsen oqarpoq.
Qanimut oqartussaaqataaneq kiffartuunneqarnerlu
Kommunerujussuanngortitsinerup kingorna innuttaasut kiffartuunneqarnerat qanimullu oqartussaaqataaneq ajorseriarsimasut, Siumut Inatsisartuni gruppiata tikkuarpaa.
Aamma atuaruk Siumut: Kommunerujussuit naliliiffigineqarlik
Aamma atuaruk Najukkani oqartussaaqataaneq unammillernarsimavoq
Kommunerujussuarnut naliliinermut nalunaarusiami takuneqarsinnaavoq, kommunerujussuanngortitsineq suliassanut arlaqartunut sunniuteqarluarsimasoq. Aamma kommuni mikinerugunik suliassat Namminersorlutik Oqartussanit nussorneqartut suliariuminaatsinnerussagaat, tassani inerniliunneqarpoq.
Taamaakkaaluartoq innuttaasut misigisimapput, qanimut oqartussaaqataaneq ajorseriarsimasoq.
Kommuni sunniuteqarluarsinnaasoq
Innuttaasullu taama misigisimanerat Qaasuitsup Kommuniata kommunalbestyrelsianut ilaasortap, Bernhard Olsenip aamma maluginiarpaa. Kommunillu mikineruppata, innuttaasut kiffartuunneqarnerat pitsaanerusinnaassasoq, taanna aamma oqarpoq. Taamaattoq kommuni angineruguni sunniuteqarsinnaanerussasoq, taamaammallu kommunerujussuit attatiinnarneqarnissaat siunissaq ungasinnerusoq eqqarsaatigalugu pitsaanerussasoq, Bernhardt Olsen isumaqarpoq.
Aamma atuaruk Kommunit avinneqarnissaat akeqassaaq
Innuttaasut kissaataat ataqqineqartoq
Qaasuitsup Kommunia avinneqassanersoq innuttaasut Kommunerujussuarnut naliliinermut nalunaarusiaq suli saqqummiunneqanngitsoq taasitinneqarput. Tassanilu amerlanerussuteqartut kommunip avinneqarnissaanik taasipput.
Taakkulu kissaataat Naalakkersuisunit pingaartinneqartoq, Kim Kielsen oqarpoq.
- Suna qanutullu kingunerissavaa, taamatut avititsineq? Aamma qassinut avinneqassava, marlunnik imaluunnit pingasunngussappat? Taakkua assigiinngitsut akissutit pissarsiareriarutsigit, tassa alloriartoqaqqinnissaa siunnerfigaarput. Kisianni Naaalakkersuisut ataqqivaat, Qaasuitsup innuttaasa isummernerat, Naalakkersuisut siulittaasuat Kim Kielsen oqarpoq.
