Najukkani oqartussaaqataaneq unammillernarsimavoq

Aningaasaqarneq aamma inatsisitigut isumannaatsuunissaq eqqarsaatigalugit kommunerujussuanngortitsineq iluatsissimavoq. Najukkanili oqartussaaqataaneq nukittorsartariaqarluni. Tamannalu eqqarsaatigalugu politikerit maanna qanoq iliuuseqarnissartik siunniuppaat.

- Kommunit ataasiakkaat imaluunniit arlallit avinneqassappata, borgmesterit Naalakkersuisullu kissaatigaat, najukkani oqartussaaqataanerup nukittorsarneqarnerat suleqatigiissutigineqassasoq, borgmesterit Naalakkersuisullu tusagassiuutinut nalunaaruteqarlutik taama allapput.

Kommunit avinneqarnissaat kissaatigineqanngilaq

Naalakkersuisut siulittaasuata, Kim Kielsenip erseqqissaatigaa, kommunit avinneqarnissaat kissaatiginnginnamiuk, tassa nalilersuinerup takutimmagu kommunit avinneqarpata tamanna aningaasartuuteqarnerulernermik kinguneqassasoq.

- Oqartussat aningaasalersorneqarnerat maanna erloqinarstorsiortoq eqqarsaatigalugu akissaqanngilagut allaffissornikkut pisariaqanngitsumik aningaasartuuteqassalluta, najukkanili oqartussaaqataanerup nukittorsarneqarnissaa pillugu suleqatigiittariaqarpugut. Tassalu tamannaassaaq oqartussat qanoq ilusilersorneqarneranut sulinermi tunaartarineqartussaq, Naalakkersuisut siulittaasuat, Kim Kielsen oqarpoq.

Taassuma aamma naqissuserpaa, najukkani ataasiakkaani oqartussaaqataaneq eqqarsaatigalugu inuiaqatigiinni oqartussaasut tamarluinnarmik tamassuma anguneqarnissaa pillugu suliniuteqartariaqartut.

Aaqqeeqataanissaq ajornannginnerusariaqarpoq

Naalakkersuisut siulittaasuata taama oqariartuuteqarnera, KANUKOKA-p siulittaasuata, Palle Jerimiasseni isumaqatigaa.

- Innuttaaasut sumiluunniit najugaqaraluarunik najukkaminni pissutsit aaqqinneqarnissaannut ajornannginnermik peqataasariaqarput taamaaliornikkut ulluinnarni atukkaminnik aaqqeeqataasinnaassallutik, Palle Jerimiassen naggasiivoq.