Kommunit avinneqarnissaat akeqassaaq

Aningaasaqarneq aamma inatsisitigut isumannaatsuunissaq eqqarsaatigalugit kommunerujussuanngortitsineq iluatsissimavoq. Najukkanili oqartussaaqataaneq nukittorsartariaqarluni.
Assi © : Nauja Møller/KNR
oktobarip 19-at 2015 13:34

Pisortat ingerlatsinerisa aaqqissuunneqarsimanera Naalakkersuisunit, KANUKOKA-mit aamma borgmesterinit sisamaasunit nalilersorneqareersorlu, Naalakkersuisut KANUKOKA-lu tusagassiuutinut taama nalunaaruteqarput.

 

Kommunit avinneqarpata tamanna unammillernartuussaaq

Nalilersuinermi aamma eqqartorneqarpoq, kommunit ilaasa avinneqarneranni suut unammillernartuunersut. Misissueqqissaarnerillu takutippaat, kommunit pineqartut annertuunik aningaasartuuteqarnerulernermik nalaanneqassasut taamatullu ikaarsaarianermi aaqqissuussaanikkut unammillerneqassasut aamma kommunit pineqartut avinneqarnerisa kingorna tamanna pissalluni.

Kommunit avinneqarneranni kommunit allanngortinneqanngitsut eqqorneqannginnissaat taamatullu kommunit avinneqarnissaat Inatsisartuni aalajangerneqartussaasoq, Naalakkersuisunit erseqqissaatigineqarpoq.

- Kommunit ilaasa marlunngorlugit arlalinngorlugilluunniit avinneqarnissaat, kommunit tamassuminnga kissaateqartut namminneq aningaasalersussagaat, Naalakkersuisut naliliipput aamma tamanna Aningaasanut Inatsimmit aningaasalesorneqassanngitsoq naliliillutik, Naalakkersuisut siulittaasuat, Kim Kielsen oqarpoq.

Aamma erseqqissarneqarpoq, Namminersorlutik Oqartussat kommunillu akornanni assigiiaartumik nammatassat suliassallu atuutsiinnarneqarpata tamanna Nunatta sinneranut sunniiuteqarumaartoq.

- Taamaattumik apeqqut tamanna kommunimut ataatsimut imaluunniit illoqarfimmut ataatsimut kisimi attuumassuteqanngilaq Nunatsinnulli tamarmut attuumassuteqarluni, tusagassiuutinut nalunaarummi taama erseqqissaasoqarpoq.

 

Suleqatigiinneq sakkortusarneqassaaq

KANUKOKA-p siulittaasuata, Palle Jerimiassenip oqaluttuaraa, kommunit suliassaannik nuussiniarnermi sulineq Namminersorlutik Oqartussanit kommuninillu sakkortusarneqassasoq.

- Tassunga atatillugu kommunit Naalakkersuisunut isumaqataapput, tassalu sanaartornerup tungaatigut akisussaaneq siullertut pingaarnerpaatinneqartariaqartoq, Palle Jerimiassen naggasiivoq.