Arsaannermiit politikerinut kissaat: Pullattakkanik arsaaffiit qulisigit

Qulisaq Nunatta unammisarfissaa ataaseq 3-400 millioner koruunilik pinnagu arsaaffioreersut allatut periaaseqarluni quligaanni tamanut pitsaanerussaaq.

Tamannaavoq Kalaallit arsaattartut kattuffiata KAKp qineqqusaartoqarnerani Amerikallu avannaani arsaattartut kattuffissuannut Concacafimut ilaasortanngorniarnermi.

KAKp siunnersuutigaa airdomesinut aningaasaliisoqassasoq. Taakku tassaapput qulisissutit pullattakkat arsaaffinnut pioreersunut ikkunneqarsinnaasut aammalu ikkunneqarfissaminnut KAKp nassuiaanera malillugu ilisserunneqarsinnaasut.

Airdomes 20 millioner koruuniniit 40-50 millioner koruuninut akeqarsinnaapput isiginnaartarfeqassanersut aamma atletikkimut arpattarfeqassanersut akimut assigiinngissutaalluni.

Piffissami kingullermi Nunatsinni silarluk peqqarniitsoq siumorneqaqattaartoq qulisissutinik sanasissaasut sisamat KAKp attavigisarpai.

- Nassaarsimapput Nunatsinni pissutsinut tulluuttumik anorersuarmut nalunaaquttap akunneranut 250 kilometeri anoraasuasartumut akiuussinnaasumik aammalu aperujussuartarneranut naleqquttunik, KAKmi siulittaasoq Kenneth Kleist oqarpoq.

Qineqqusaarneq kissaatillu

Qulisaliornissamik Nuummi suleqatigiit  siornatigut Nunatta unammisarfissarsuanik siunnersuuteqarnikuupput. Siunnersuut taanna 300 millioner koruunit sinnerlugit akeqartussatut missigersorneqarpoq.

KAK-lli siunnersuutigaa aningaasaliissutit illoqarfinnut arlalinnut agguataarneqassasut.

- Eqqaamanerlunngikkukku Nunarput tamaat isigalugu arsaattarfiit 20-it missaanniipput. Taakku qulisinnaagaanni ukioq kaajallallugu atorsinnaalissagaluarput qaammatit marluk pingasuinnaat atorunnaarlugit, Kenneth Kleist oqarpoq.

Maanna Inatsisartunut kommunenullu qineqqusaartoqarpoq taakkuuppullu kissaatigisamut aningaasaleeqataasussatut KAKp isumalluarfigisai. KNRip KAK aperivaa airdomes pillugu saqqummiussinissartik qineqqusaartoqarneranut inisseriagaanersoq.

- Tamannarpiaq maanna saqqummiinitsinnut tunngaviunngilaq. Ukioq ataaseq missaliorlugu saqqummiisinnaalernissarput piareersarparput. Ilisimaneqartutullu Amerikap avannaani arsaattartut kattuffissuat Concacaf ilaasortanngorniarfigalugu attaveqatigiinnerit ingerlapput qulisaliortitsernissamullu pilersaarut ineriartortitsinermut suliniutitut tassani tunngavilersuutitut atorsinnaalluarparput, Kenneth Kleist oqarpoq.

- Aap, qineqqusaartoqarpoq kissaatigisarpulli pillugu illugiinnut ingerlasoqarsinnaavoq. Uagutsinnut pingaarneruvoq takutissallugu suliniummut 3-400 millioner koruuninut akilimmut sanilliullugu allanik periarfissaqartoq, Kenneth Kleist naggasiivoq.