ASSIT Puisip amia aappilarujuttoq X Factorimi soqutigineqarluartoq
- Kavaajat kusanarluinnarpoq!
X Factorimi naliliisartoq, Thomas Blachman, VKationip tallimanngormat tusarnaartitsinerani taama nersualaarivoq.
Eqimattami peqataasup ataatsip William Vedel Kristensenip kavaajaq nammineerluni toqqarsimasaa sinaakkutaasigut talitaatigullu aappalorujuttortaqarpoq.
- Victor takutitsilluarnerulaassasutit isumaqarpunga, Blachman eqimattami ilaasup aappaanut alutornarpallaanngitsumik kavaajaqartumut Victor Vedel Krusemut oqarpoq.
AAMMA ATUARUK EU vil ikke markedsføre grønlandsk sælskind
Blachmanip naliliisartoqataata Remeep puisip amianik kavaajaliaq aamma oqaaseqarfigaa:
- Takugakkit eqqarsarpunga: Aamma suunuku atisimagai? Isumaqaramami oqorpallaartunik uattulli atisisimasutit. Tusarnaartitsillusili aallarteriarassi siunertaa takusinnaalerpara. Torrattumik atisalersorneqarpusi – aaqqissuussaq torrallataasorujussuuvoq, Remee oqarpoq.
Kavaajaq asseqanngitsoq
Kavaajaq danskimit ilusilersuinermik ilinniartumit Sandra De Silvamit sananeqarsimavoq. Ataasiinnartullu nunarsuarmi allamik asseqanngitsutut sanaajulluni. Sandra De Silva naapertorlugu kavaajaq naggueqatigiit inuit ileqqutoqaq malillugu atisalersortarnerannit hiphopillu kulturianit isummersornikkut sanaajuvoq.
- Puisip amia kusanarluinnarlunilu suliariuminartuusoraara. Ilusilersuigaangama angutit qanoq ittunik atuisinnaanerannut killissat qaangerniartarpakka. Tassalu ameq qalipaallu aappalorujuttoq qaangerniartarlugit – qanormi ippa marluutillugit qaangerlugit?, Sandra De Silva oqarpoq.
Nuannaarutigineqartoq
Danskit tv-kkut aallakaatitsineranni isiginnaarneqarluartartumi puisip amiata taama pilerisaarutigineqarnera Great Greenlandimit qiimmatsaatigaat:
- De Silvap ilusilersugaa X Factorimi takulluarnartorujussuuvoq. Taama isiginnaartoqartigisartumi takutinneqarnera puisip amiata qanoq isigineqartarneranut isumaqartorujussuuvoq. Ilusilersorneqarneratalu naliliisartunit taama nersualaarneqarnera erseqqissarneqarneralu pitsaaneroqqiffissaqanngilaq, Great Greelandimi pisortaq Ditte Sorknæs oqarpoq. Taassuma aamma X Factorimi naliliisartup Mette Lindbergip puisip amianik teqqiaqarnera maluginiarsimavaa.