Qasigissat amii piumaneqaraluartut Great Greenland ikiuussinnaanngilaq

Qasigissalli Nunatta imartaaniittut ukiut arfinillit matuma siornali eqqissisimatitaalluinnalerneri pissutigalugu amii Nunatsinni pissarsiarineqarsinnaanngillat.

Qasigissallu amiinnik pisisinnaannginneq pissutigalugu Great Greenlandimut naammagittaalliortoqarajuttarsimavoq.

Great Greenlandili qasigissat amiinik tuniniaasinnaanngitsoq, pisortap Ditte Sorknæsip tusagassiuutinut nalunaarutigaa.

- Inuit pakatseqqapput, uagulli ikiuisinnaanngilagut. Puisi eqqissisimatitaalluinnarpoq, tamannalu Great Greenlandimit soorunami ataqqineqarpoq, Ditte Sorknæs allappoq.

Qasigissat amiinut assingusunik pisisoqarsinnaasoq, Sorknæsip oqaatigaa, taassumalu natsit amiinik taartunik erseqqissunillu milattalinnik pisisoqarnissaa kajumissaarutigaa.

Qasigissallu eqqissisimatitaalluinnarnerat ataqqineqarnissaa pingaaruteqartoq, Pinngortitaleriffimmit nalunaarutigineqarpoq.

- Qasigissat Nunatsinni qaqutigoorluinnarput. Nunatsinni nunguliivissullu 2010-mi eqqissisimatitaalluinnarneqalerput. Piniarneqaannassappatalu Nunatsinni suli nungussinnaapput, Pinngortitaleriffimmi ilisimatooq Aqqalu Rosing-Asvid Great Greenlandip tusagassiuutinut nalunaarutaani oqarpoq.

Aamma atuaruk Great Greenlandip angusai naammaginanngitsut

Aamma atuaruk Great Greenlandimi isumalluartoqarpoq