Great Greenlandimi isumalluartoqarpoq
2015-mi angusarineqartut naammaginanngilluinarput, Great Greenlandimi pisortaq Ditte Sorknæs oqarpoq.
- Pissutsit ajorluinnarsimapput.
Taama oqaluttuarpoq Ditte Sorknæs, nunarsuarmi ammit akiisa apparaluttuinnarnerat angusarineqartut ajornerannut ilaatigut tamanna pissutaasoq taanna oqarpoq.
Aamma atuaruk Great Greenlandip angusai naammaginanngitsut
- Pissutsit iluarnerulinngillat, naggueqatigiit inuit pineqannginnissaanik EU-mi aalajangersakkap sivitsorneqarnissaanik EU-mi alajangiisoqaraluartoq, Kalaallit Nunaat nunani EU-mi ilaasortaasuni puisinit pisunik tuniniaasinnaanera periarfissaagaluartoq.
- Taamattumik puisit amiinik piserusunngitsut amerlapput, pisiarisatik tunineqanngitsoornissaat ernummatigigamikku, Gitte Sorknes oqarpoq.
Unammillernartup aappaa tassaasimavoq puisit amii Great Greelandimut tunineqartut 2015-mi ikinnerusimagamik aamma ammit pitsaassusiat ajorseriarsimammat.
Aamma atuaruk KNAPK-p Great Greenlandillu puisit amii pillugit isumaqatigiissutertik nutarteraat
- Ammit ajorluinnartut amerlavallaartut uninngasuutigagut taakkualu tunisassarineqarsinnaanngillat.
Tamanna nunanut kangianiittunut tunisassiornissamut misiliinissaq unitsissinnaavaa aallartinneqaraniluuniiit, Ditte Sorknæs oqarpoq.
- Tamannalu ima kinguneqarsinnaavoq, nunanut kangianiittunut tunisassiorneq ammaanneqarpat, tamannalu ilimanarluinnartuuvoq, tunisassarineqarsinnaasut piginnanngitsigit tamannalu ajornartorsiutaavoq annertoorujussuaq Great Greenlandimi direktør Ditte Sorknes taama oqarpoq.
Naak Kalaallit Nunaata EU-mi tuniniaavinnut puisinit tunisassianik eqqussisaannarnissaanut periarfissiisumik Inuit pineqannginnerannik EU-mi peqqussuteqaraluartoq ingerlatseqatigiiffik Namminersorlutik Oqartussanit pigineqartoq Great Greenland amigaartooruteqarpoq.
Aamma atuaruk Natsiit amiinik suliareqqiisarneq Great Greenlandip nangissavaa
2014-mi amigartoorutit 38 million kr-ningajaapput ukiup siuliani eqqartuussinermit pissarsiarineqartussat ilanngunneqarsimmmata taakkuali ingerlatseqatigiiffiup pissarsiarinngitsoorpai.
Taamaakkaluartoq Great Greenlandimi pisortaq 2016-mut isumalluarpoq.
- Ukiup affaa maanna angulerparput manna tikillugu missingersuutigineqartut malippagut. Taamatut ingerlaannassagutta amigaartooruteqaratalu sinneqartooruteqaratalu ukioq naasinnaavarput Ditte Sorknes oqarpoq.
