Amagerimi tarnikkut nappaatinik katsorsaavik naammattumik nalunaarsuisarnissamik peqquneqartoq
Amagerimi tarnikkut nappaatinik katsorsaavik, Psykiatrisk Center Amager, Danmarkimi peqqissutsimut aqutsisoqarfimmit mianersoqqussummik tunineqarpoq.
Amagerimi pisiniarfissuarmi Fieldsimi aallaasersorsimasutut pasineqartoq tarnikkut nappaatinik katsorsaavimmi Amagerimmiittumi siorna katsorsarneqarnerani aallaasersorpoq.
Tamanna nakkutilliisut nalunaarusiaanni, napparsimasut isumannaatsuunissaanut aqutsisoqarfiup ullumi ataasinngornermi saqqummiussaani takuneqarsinnaavoq.
AAMMA ATUARUK Fieldsimi aallaasersorsimasutut pasisap tigummigallagassaanini akuerigaa
Katsorsartittut aaqqissuussamik malinnaaffigineqarnissaannik nakorsaatitortinneqarnerannilu katsorsartittup nakorsaanik psykiaterinianilluunniit suleqatigiiinnerisa qulakkeerneqarnissaanik naammmattumillu nalunaarsuiffinnut allattuinerit qulakkeerneqarnissaat tarnikkut nappaatinik katsorsaavik Amagerimiittoq peqquneqarpoq.
Nakkutilliisut nalunaarusiorput, tarnikikkut nappaatinik katsorsaavimmut Amagerimiittumut siorna novemberip ulluisa 29-anni pulaarnerannut atatillugu.
Angut 22-nik ukiulik pisiniarfissuarmi Fieldsimi siorna juulip ulluisa pingajuanni aallaasersornerani inunnik pingasunik toqutsisimasutut pasineqarpoq.
Angut taanna tarnikkut nappaatilinnut katsorsaavimmut Amagerimiittumut aallaasersornissani ukiup affaa sioqqullugu saaffiginnissimagaluarpoq ikioqqulluni.
