Fieldsimi aallaasersorsimasutut pasisap tigummigallagassaanini akuerigaa
Angutip 22-nik ukiullip Københavnimi pisiniarfeqarfissuarmi Fieldsimi inunnik pingasunik toqutsisimasutut inunnillu allarpaalunnik ikiliisimasutut pasisap tigummigallagassaanini akuerigaa, immikkut ittumik unnerluussisussaatitaasoq Søren Harbo Ritzaumut ilisimatitsivoq.
Angut taanna tarnikkut nappaatiliusoq qoorortuumik Fieldsimi inunnut juulip pingajuanni aallaasersormat inuit tatammullutillu ersiorput. Angut 47-nik ukiulik aamma niviarsiaraq nukappiararlu 17-nik ukiullit toqutaapput.
Inuillu allat arfineq-pingasut aamma aallaaneqarlutik ikiligaapput, taakkualu ilarpaalui ikiligaanerminnit perulullutik. Tamatumalu saniatigut inuit aamma allat pisiniarfeqarfissuarmit qimaanerminni ajoquserput.
Tarnikkut nappaatilinnut immikkoortortaqarfimmi matoqqasumi tigummigallagaasoq
Angut taanna politiinit tigusarineqalertorpoq. Juulillu 28-ata tungaanut tigummigallagassanngortinneqassasoq, eqqartuussiviup aqaguani aalajangerpaa.
Angutip taassuma eqqartuussivimmi juulip 28-anni sassarnissi kissaatiginngikkini tigummigallagassaaninili akuerigini, illersuisuata nalunaarutigigaa, immikkut ittumik unnerluussisussaatitaasoq Søren Harbo Ritzaumut ullumi marlunngornermi oqarpoq.
AAMMA ATUARUK Anja Taunajiip Fieldsimi toqoraasutut pasisaq qanimorpaa: Eqqarsarpunga killissara tikillugu
Tassa angut taanna tarnikkut nappaateqarnini pissutigalugu isertitsivimmi nalinginnaasumiunngitsoq tarnikkulli nappaatilinnut immikkoortortaqarfimmi matoqqasumi tigummigallagaavoq.
Eqqarsartaatsimigut misissorneqassasoq
Angut taanna inatsit tunngaviusoq naapertorlugu matoqqasumik killisiorneqassasoq Københavnimi eqqartuussivimmi eqqartuussisoq aalajangerpoq, taamaammallu paasissutissat suliamut tassunga tunngasut ilarpassui tamanut suli saqqummiunneqanngillat. Ilaatigullu angutip unnerluussutit qanoq isumaqarfiginerai ilisimaneqanngilaq.
Angulli taanna tigummigallagaangippat pinerluttoqarsimaneranik paasiniaanermik soorlu unnerluussutini uppernarsaataasinnaasunik piiaanikkut inunnullu allanut sioorasaarinikkut kimigiisernikkulluunniit naammassiuminnaaallisitseratarsinnaanera ernummatigineqartoq, eqqartuussiviup unnerluussutit pillugit nassuiaataani takunnissinnaatitaaffiusinnaasuni allaqqavoq.
AAMMA ATUARUK Sara Brandt Fieldsimi perusuersartarfimmi minutsit 15-ingajaat toqqoqqasoq
Angut taanna eqqarsartaatsimigut misissorneqassasoq, eqqartuussiviup killisiunermi aamma aalajangerpaa. Angut taanna unnerluussutinut pisuutitaassappat, eqqarsartaatsimigut misissorneqarnerani paasisat tunngavigalugit parnaarussassanngortinneqassanersoq tarnimulluunniit nakorsanit aqunneqartumik iliuuseqarfigineqassanersoq nalilerneqassaaq.
