Pooqattat tigumiaannartakkat ulluat
Angalasussat Københavnip mittarfianut ullaaq iseramik, takusinnaasaat tassaapput nerriviit poortuisarfiit 25-it piareeqqatinneqalersimasut. Nerriviit poortuiffittut atorneqartussat juullimut attuumassuteqanngillat.
”Ulloq taskit tigummiaannartakkat ulloraat”, tassami pooqattat timmisartornermi tigummiaannartakkat pillugit malittarisassat nutaat ullumikkut atuutilerput.
Malittarisassat nutaat atuutilernerisigut Københavnimi timmisartoqarfimmi Kastrupimi ullaaq manna uiverneqarujussuarnissaa ernummatigineqaraluarpoq, taammaattoqanngilarligooq. Nalunaaqutaq arfineq-pingasut qulingiluallu akornanni pisarnertut ulapiffiusimavoq, timmisartoqarfimmili sulisut timmisartumullu ilaasussat ilimagisamit eqqissisimasimaqaat, Sterlingimi niuernermi pisortaaneq, Stefan Vilner, nassuiaavoq.
- Sulisugut oqaloqatigeqqammerpakka. Aallalernermi tunniussinissaq eqqarsaatigissagaanni ajornartorsiuteqanngivippugut, kisianni sillimaniarneq pillugu misissuisarfimmi utaqqisut pisarnermit amerlanerupput. Oqarsinnaavungali nutaanik malittarissassaqaleraluartoq suna tamarmi ingerllluarpoq, uanga takusinnaasakka malillugit.
Nerriviit poortuiffittut atorneqartussat 25-t ikittuinnaat atorpaat.
Angalanermi taskit tigummiakkat pillugit malittarisassat sukateriffigineqarnerisigut, nassatat imerpalasut, soorlu quliutit, puujaasamut allamut kueriarlugit, tassa puujaasamut 1 deciliterisut imaqarsinnaasumut kuineqartalissapput.
