Pompeop tusagassiortunik katersortitsinerani: Steen Lynge tusarnaartut akornanni issiasariaqartoq
![](/sites/default/files/styles/image_934x467/public/article_images/steendone.jpg?itok=gOiEIKIh)
Amerikamiut nunanut allanut tunngasunut ministeriat, Mike Pompeop danskeq suleqatini, Jeppe Kofod peqatigalugu tusagassiortut naapippai.
Tamanna Københavnimi Eigtveds Pakhusimi tusagassiortunik katersortitsinermi pivoq.
Nunatta nunanut allanut tunngasunut naalakkersuisuata, Demokraatineersup, Steen Lyngep naalakkersuisoqarfiup pisortaa, Kenneth Høegh peqatigalugu inimi tunorlerpaami issiasariaqarsimapput.
Steen Lyngemi Savalimmiormiulluunniit nunanut allanut tunngasunut ministeriat, Jenis av Rana peqataanissamut qaaqquneqanngillat – aamma naak tamanna Naalakkersuisut kissaatigigaluaraat.
AAMMA ATUARUK Lynge Pompeop ataatsimeeqatiginnginnerani: Isumaqatigiinngittoqassaaq
Nunanut allanut tunngasunut Naalakkersuisoqarfilli tassunga taarsiullugu katersortitsivimmi tusagassiortut takkuttut akornanni issianissartik tusagassiortunik katersortitsisoqannginnerani piumasaqaatigisimagaat, KNR-ip paasivaa.
Jenis av Rana tusagassiortunik katersortitsinermi najuutinngilaq. KNR-ip paasissutissaatai naapertorlugit Savalimmiormiut naalakkersuisuisa tusagassiortunik katersortitsinissamut peqataanissartik piumasaqaatigisimanngilaat.
Naalakkersuisoq: Nunarput Danmarkilu naligiinngillat
- Naligiittoqanngilaq. Tamanna paasissutissaavoq. Nunattami nunanut allanut, illersornissamut sillimaniarnermullu politikkimut tunngasut nammineq aalajangiiffigisinnaanngilai. Aatsaat akisussaaffik tigugutsigu ulloq taanna naligiilissaagut, Steen Lynge oqarpoq.
Steen Lyngep Jenis av Ranallu ataatsimiinnermi Issittoq Atlantikullu avannarpasissua pillugu ataatsimiinnermi Mike Pompeo Jeppe Kofodilu immikkoorlutik ataatsimeeqatigaat. Tamatuma kingorna danskit amerikamiullu nunanut allanut tunngasunut ministerii nunanut allanut tunngasunut politikkikkut sammisat allat pillugit kisimiillutik ataatsimiipput.
![](/sites/default/files/styles/image_934x467/public/20200722-153332-l-1920x1258we.jpg?itok=3lIHbSz9)
Mike Pompeo aamma Jeppe Kofod. Assi: Scanpix
Naalli Issittoq Atlantikullu avannarpasissua pillugu ataatsimiittoqaraluartoq nunanit avannarlernit naalakkersuisut Kofod Pompeolu peqatigalugit oqaaseqartarfimmut qaaqquneqanngillat. Pissutaasoq erseqqinngilaq. Naallu Jeppe Kofod Pompeolu sooq kisimiinnersut tusagassiortunik katersortitsinermi qasseeriarluni apeqqutigineqaraluartoq, tamanna Jeppe Kofodip akissuteqarfiginngilaa.
Taamaakkaluartorli Steen Lyngep Pompeop ataatsimeeqatiginera ajunngitsuusoq inimi issiavinni tunorlerpaaniit aalajangiusimavaa. Mike Pompeommi ataatsimeeqatiginissaanut nunatta Savalimmiullu qaaqquneqarnerat danskit naalakkersuisuisa naalagaaffeqatigiinniittunik tamanik nunanut allanut tunngasunut politikkimut peqataatitserusussuseqarnerannik takutitsineruvoq. Tamannalu alloriarnerusoq, Steen Lynge KNR-imut oqarpoq.
- Danskit naalakkersuisuisa qinersisoqaqqammernerani nalunaarutigisaasa ilaannik eqquutsitsinertut isigivara: Tassa sillimaniarnermut, illersornissamut nunanullu allanut tunngasunut politikkimut atatillugu nunatta peqataatinneqarnerunera aamma Savalimmiut, naalakkersuisoq oqarpoq.
Kofod: Isornartorsiuineq ilisarinngikkaa
Pompeop Kofodillu tusagassiortunik katersortitsinerat sivikitsuararsuuvoq. TV2 amerikamiullu tusagassiorfiat, Fox News kisimik apeqquteqarnissamut periarfissinneqarput. Tamatuma kingorna politikerit inimit aninnginnerminni imminnut ullormut qujassuteqarfigipput.
Danskit nunanut allanut tunngasunut ministeriata, Jeppe Kofodip nammineq naalakkersuisullu Savalimmiut Kalaallit Nunaatalu qaninnerusumik suleqatigerusunnertik qasseeriarluni erseqqissaatiginikuuaa.
Tamanna Steen Lynge aamma Jenis av Rana peqatigalugit Mike Pompeop Danmarkimut tikinnissaanut ulloq ataaseq sioqqullugu - tusagassiortunik marlunngornermi katersortitsinerminni aamma oqaatigaa.
AAMMA ATUARUK Steen Lynge: Præsidentimut qinersisoqannginnerani Pituffik pillugu isumaqatigiinniarnissaq piviusorsiorpoq
Jeppe Kofodip pingasunngorneq ’naalagaaffeqatigiinnut ullutsialaasoq’ oqaatigaa.
- Ataatsimiippugut, sisamaallutalu (USA, Danmark, Savalimmiut, Kalaallit Nunaat aaqq.) assiliseqatigilluta, taanna KNR-imut oqarpoq.
- Issittumut aamma Savalimmiunut Kalaallit Nunaannullu attuumassuteqartunut atatillugu ullutsialaavoq. Tamanna nuannaarutigingaatsiarpara, Jeppe Kofod oqarpoq.
Savalimmiormiut selvstændighedspartiata, Tjóðveldip siulittaasuata, Høgni Hoydalip Savalimmiut Mike Pompeop ataatsimeeqatigineqarnerani tamani peqataannginnera pillugu Politikenikkut isornartorsiuivoq.
Jeppe Kofodilli ’isornartorsiuineq taanna ilisarisinnaanngilluinnarlugu’, oqaatigaa.
- Sammisanut Kalaallit Nunaannut Savalimmiunullu attuumassuteqartuni tamani amerikamiut nunanut allanut tunngasunut ministeriat ataatsimoorluta ullumikkut ataatsimeeqatigaarput, tamanna pitsaallunilu ajunngilluinnartuusoraara, Jeppe Kofod oqarpoq.