Steen Lynge: Præsidentimut qinersisoqannginnerani Pituffik pillugu isumaqatigiinniarnissaq piviusorsiorpoq

Amerikamiut præsidentimut novembarimi qinersinnginneranni Pituffimmi kiffartuussinissamut nutaamik isumaqatigiissusiornissaq piviusorsiortoq, Steen Lyngep Mike Pompeo ataatsimeeqatigereerlugu oqaatigaa.
Nunanut allanut tunngasunut naalakkersuisup, Steen Lyngep Mike Pompeo ataatsimeeqatigereerlugu Pituffimmi kiffartuussinissamut isumaqatigiissutit nutaamik neriuuteqarfigilerpai. Assi © : KNR
juulip 22-at 2020 13:50

USA-mit, nunatsinnit, Savalimmiunit Danmarkimiillu nunanut allanut tunngasunut naalakkersuisut Københavnimi ullumi ataatsimiinneranni aalajangersimasumik isumaqatigiissuteqartoqanngilaq.

Taamaakkaluartorli Pituffimmi kiffartuussinissamut isumaqatigiissutit ukiorpassuarni oqallisigineqartartut ammaavigineqalaarput.

Nunanut allanut tunngasunut naalakkersuisup, Demokraatineersup, Steen Lyngep nunatta kiffartuussinissamut isumaqatigiissutinut piumasaqaatit isumaqatigiissutiginiaqqinniarai ataatsimiinnermi saqqummiuppaa. Tamannalu amerikamiut nunanut allanut tunngasunut ministerianit, Mike Pompeomik ammasumik akuersaarneqarpoq.

AAMMA ATUARUK Pompeo Københavnimut tikittoq: Issittoq Pituffillu oqallisigaavut

Steen Lynge KNR-imut taama oqarpoq.

- Isumaqarpunga taanna tigulluarneqartoq ammasumik, tassa Pompeop oqariartuutigivaa nunatsinnut iluaqutaasumik aamma aaqqiinissamut ammallutik.

Pompeo: Kalaallit Nunaat Pituffimmit iluaqutissarsilluassaaq

Steen Lyngep oqarnera naapertorlugu nunatta Pituffimmi kiffartuussinissamik isumaqatigiissutit iluaqutilluassagaanik USA-p ammasumik oqarnera nutaavoq.

Isumaqatigiissusiornissami suut ilaatineqarsinnaassanersut taassuma oqaatigisinnaanngilaa.

Taamaattorli USA-mi præsidentimut novembarimi qinersisoqannginnerani nunatta, Danmarkip USA-llu nutaamik isumaqatigiissusiorsinnaanissaamut periarfissaqarpoq.

AAMMA ATUARUK Lynge Pompeop ataatsimeeqatiginnginnerani: Isumaqatigiinngittoqassaaq

- Suligasuarneq pitsaasumik tiguneqarsinnaavoq, aap qinersisoqalerpoq, taamaattumik aamma neriuutigaara suleqatigiinneq sukkasooq kisiannili pitsaasumik kinguneqartussaq atorumaaripput, Steen Lynge KNR-imut oqarpoq.

USA-p Pituffimmi kiffartuussinissamut nutaamik isumaqatigiissusiorneq ingerlateqqinniaraa amerikamiut nunanut allanut tunngasunut ministeriata, Mike Pompeop Københavnimi tusagassiortunik pingasunngornermi ualikkut katersortitsinermi oqaatigaa.

- Kalaallit sanilerisatta Pituffimmit iluaqutissarsilluarnissaat qulakkeerniarlugu suliaqaqqissaagut. Sammisaq tamanna tamatsinnut pingaaruteqarluinnarpoq, Mike Pompeo oqarpoq.

Pituffimmi kiffartuussinissamut isumaqatigiissutit amerikamiut 2014-imi tiguaat, tamanna nunatsinnut annaasaqaataalluni. Isumaqatigiissuteqartoqanngikkallarpat tamanna nunatta karsiata ukiumut 200 millionit koruuninik iluanaaruteqarfigisaraluarpaa.