Politikerit inatsisitigut piumasaqaat puigoraat
Piumasaqaataalernerali juulip aallaqqaataani atuutsinneqalerpoq.
Siumumit Partii Naleqqamiillu ilaasortat tassaapput suli nalunaarsimanngitsut.
Nalunaarnissaq inatsisartut ataasiakkaat namminneerlutik akisussaaffigaat, inatsisartut allattoqarfiannit oqaatigineqarpoq.
Aamma atuaruk Transparency Greenland: Inatsisissatut siunnersuut malinnaasinnaatitsinerulissaaq
Inatsisartullu siulittaasuata, Lars-Emil Johansenip KNR-mut oqaatigaa Juunip aqqaneq aappaanili, inatsisartut allatoqarfiannit nalunaartussaatitaaneq pillugu partiit allattoqarfiinut, ataatsimiitsitalianut inatsisartunilu ilaasortanut nassiussorneqarsimasoq.
Maannakkumullu nalunaareerfissamit qaammat qaangiutikatareerpoq. Siumumit Inatsisartunut ilaasortat tallimat aammalu Partii Naleqqamit Inatsisartunut ilaasortat pingasuusut tamarmik tassa suli maannamut inatsisartut atuuffinik nalunaarsuiviannut nalunaarsimanngillat.
- Puigorakku, nalunngikkaluarpara nassiuttussaasoq, ullullu ingerlanerani aaqqinneqassaaq, Nikolaj Jeremiassen Siumumit Inatsisartuni ilaasortaq, inatsimmullu suliarinnittuni Suleriaaseq pillugu ataatsimiitsitaliami ilaasortaq taama oqarpoq.
Aamma atuaruk Aningaasarsiornikkut ammasuunissaq Anda Uldumip tapersersorpaa
Partii Naleqqamilu ilaasortat nalunaarfigineqarsimannginnerat peqqutaasoq, Per Rosing Petersenip KNR-mut oqaatigaa.
- Juunip aallaqqaataanili allattoqarfitsinni sulisueruppugut, taamaattumik nalunaarsimanngitsugut. Ilakka eqqaasissavakka nalunaarnissaq pillugu, Per Rosing Petersen oqarpoq.
Maleruagassalli nutaat inatsisartunut nutaajunngillat. Piumasaqaataalernerammi Inatsisartut upernaami ataatsimiinneranni politikerit namminneq allanngortinnissaat akueraat.
Aamma atuaruk Naalakkersuisut aningaasaqarnikkut soqutigisaat paasinarsipput
