Transparency Greenland: Inatsisissatut siunnersuut malinnaasinnaatitsinerulissaaq

Inatsisartunut ilaasortat, inuussutissarsiutitigut namminneq soqutigisaasa paasissutissiissutigineqartalernissaanut siunnersuut, aqqummut ajunngitsumut ingerlaneruvoq.

Transparency International Greenlandimeersoq, Anita Hoffer, taama isummerpoq.

- Siunnersuutigineqartoq 100 procentimik taperserparput, innuttaasut qinikkamik inuttut namminneq soqutigisaminnik suliaqarsinnaanerat aammalu aningaasaqarnermut soqutiginninnerat, qinersisartunut malinnaasinnaatitsinerulissammat taperserparput. Anita Hoffer taama oqarpoq.

Aamma atuaruk Niaqornani sulisut ikiorserneqarsinnaalerput

Anita Hofferillu aamma oqaatigaa, politikerit soqutigisaminnut tunngatilugu nalunaarsuisalissappata, innuttaasut politikerit suliaminnut assigiinngitsunut suleriaasaat apeqqusersinnaanngussagaat erseqqissarlugu.

- Politikerit soqutigisaqaqatigiilissappata innuttaasunit tamanit takuneqarsinnaalissapput, tamannalu uagut ersarinnerulersitsinermik kinguneqassasoq takusinnaavarput. Transparency International Greenlandimi pisortaq, Anita Hoffer KNR-mut taama oqarpoq.

Upernaakkut ataatsimiinnerit siullersaanni, Inatsisartut Siulittaasoqarfianit siunnersuummut isumaqataaginnartoqanngilaq.

Aamma atuaruk KNT-p siulersuisuini ilaasortap akiitsut annertunerat tupaallaatigaa

Naalakkersuisut siunnersuutigineqartumut oqaaseqarfigalugu allapput:

- Naalakkersuisut tulluarnerusoraat, soqutigisat aningaasaqarnerlu pillugit partiit iluminni saqqummiukunikku pitsaanerusoq.  Aningaasaqarnikkut pinngitsaaliissummik iliuusereriikkamut kingunereqartitsisoqassappat, ilaasortaaqataasut eqqugaassapput.

Inatsisissatut siunnersuut akuerineqarpat ukioq manna juulip aallaqqaataani atuutilissaaq.