KNT-p siulersuisuini ilaasortap akiitsut annertunerat tupaallaatigaa

Radioaviisimi ippassaq issuarneqarpoq sumiiffimmi TV-eqarfimmi, Nuuk TV-imi oqaluttuarineqartoq, tunisassiorfiup KNT-p Niaqornani Qaarsunilu tunisassiorfeqartup akiitsui katillutik 4,5 million koruuniusut tunissallu akileraarutaannit 1,2 millon koruuninik akiitsoqartoq.

Jakob Kruse, Uummannaq, KNT-p siulersuisuunerini siorna decembarimi ilaasortanngortoq maanna tunuarniarluni aalajangerpoq.

- Taama annertutigisorsuarnik akiitsoqarnissaa ilimaginngikkaluarakku, siusinnersukkut nalunngilara akiitsoqalaartoq, aamma siorna decembarimi ataatsimeersuaratta, direktøri oqarpoq, KNT 34.000 koruuninik amigartoortoq, naatsorsuiffik kingulleq pineqarluni, taamaattumik isumaqaraluarpunga tamakkua tamarmik ajunngitsumik ingerlasut, Jakob Kruse oqarpoq. 

- Sunaaffa akileraarutinut 1,2 million koruuninik akiitsoqartoq, tamakkuninngalu uagut nalunaarfigineqarnikuunngilagut, KNT-imi siulersuisuugallartut siulittaasuat Jakob Kruse oqarpoq.

Jakob Kruse tamakkua pillugit ilisimatinneqarsimanani radioaviisimut oqaluttuarpoq maannalu tunuarniarluni aalajangerpoq.

- Taamaattumik akisussaaffik taama annertutigisoq tigummerusunngilara, ilaquttakka meeqqakkalu oqaloqatigeerlugit  allatut ajornartumik aalajangerpunga, akisussaaffimmik taama annertugisumik tigummisaqarnissara tassunga killeqartutut naatsorsuutigigakku, Jakob Kruse oqarpoq.

Jakob Krusep ilanngullugu nalunaarutigaa, KNT-imi siulersuisuugallartut KNT-p naatsorsuutaanik taamatullu aningaaserivinni uninngaasuutaanik takusaqarsinnaanatik, taakkua Jakob Krusep oqarnera malillugu, pisortap Mikael Petersenip tigumimmagit. 

KNT-imi siulersuisuugallartut ualimut tallimanut ataatsimiipput.