Aningaasarsiornikkut ammasuunissaq Anda Uldumip tapersersorpaa
Inatsisartunut ilaasortat inuussutissarsiutitigut aningaasarsiornikkullu soqutigisaat inatsisitigut saqqummiunneqartarnissaannik Inatsisartut siulittaasoqarfiata siunnersuutaa, aningaasaqarnermut aatsitassanullu naalakkersuisup Andreas Uldumip tapersersorpaa.
Inatsisartunut ilaasortat aningaasaqarnikkut paasissutissat saqqummiunnianngikkunikkit inatsisartunut ilaasortaanermut tapiissutit annaasinnaavaat.
Inatsisartuni ilaasortat aningaasatigut ammasuunissaat Naalakkersuisoqatigiit isumaqatigiissutaannut ilaavoq.
Siunnersuummut Naalakkersuisut tunuarsimaarput oqaaseqaateqarnerminnilu allapput inatsimmik unioqqutitsinermi pinngitsaaliilluni imaluunniit kinguneqartitsilluni pisoqassanngitsoq.
AAMMA ATUARUK Transparency Greenland: Inatsisissatut siunnersuut malinnaasinnaatitsinerulissaaq
Demokraatit siulittaasuata Naalakkersuisunullu ilaasortap Andreas Uldumip aningaasatigut soqutigisat saqqummiunneqarnissaanut siunnersuut isumaqatigaa, aamma saqqummiussisimanngitsunut kinguneqartitsinissaq Inatsisartut kissaatigippassuk.
- Ammasumik ingerlatsisoqarnissaa sutigut tamatigut tapersersugarivara, Inatsisartut siulittaasoqarfiata siunnersuutaa taamaattumik tapersersorpara, Andreas Uldum oqarpoq.
Inatsisartunut ilaasortat aningaasatigut inuussutissarsiutitigullu soqutigisaat tamanut saqqummiunnianngippatigit Inatsisartunut ilaasortanut tapiissutit ilaanngaatigineqassasut siunnersuutigineqarpoq.
- Inatsisartut siulittaasoqarfiata siunnersuutaata Inatsisartuni oqaluuserineqarnissaa utaqqimaarusuppara, taava Inatsisartut qanoq aalajangissanersut utaqqissavara, Andreas Uldum oqarpoq.
Aningaasaqarnermut aatsitassanullu naalakkersuisup Andreas Uldumip aningaasatigut inuussutissarsititigullu soqutigisani Inatsisartut siulittaasoqarfiannut nassiussimavai.
- Aningaasaqarnikkut inuussutissarsiutitigullu soqutigisakka Inatsisartut siulittaasoqarfiannut kingullermik nassiussakka allanneri marluinnaapput: Sumilluunniit ingerlataqanngilanga uanga!
