Truckit aallarunneqartut politiinit malersorneqartut kussinermut nakkartut
Gaffeltruckit aallarunneqartut, politiit biilii ajoquserneqartut, gaffeltruckillu kussinermut nakkartut.
Apriilip aallaqqaataani salloqittaatitut immaqa paasineqarsinnaavoq, kisianni Qaqortumi taama pisoqarpoq.
Qaqortumimi aserorterisoqarneranik persuttaasoqarneranillu, Qaqortumi politiit ippassaq ualikkut nalunaaqutaq marlunut kalerrinneqarput.
- Sianertoqarmat taava soorunami qisuariarpugut alakkarteraluta. Kingusinnerulaartukkut aamma saaffiginnissut takkuppoq truckinik aallarussineq pillugu. Saaffiginnissut takkuteriarmat ujartorneqalerpoq, kingusinnerulaartukkullu naammattoorneqarluni. Kalaallit Nunaanni politiit pigaartuisa ilaat Malik Olesen taama oqaluttuarpoq.
Politiit malersuinerannik videoliaq:
Video: Vera Fleischer Olsen.
Taava unitsitsiniaaneq aallartippoq.
Truckit aqqusinikkut ingerlaartut, politiillu biilinit malinneqartut Facebokkikkut takuneqarsinnaavoq. Politiit biilii allat truckit tungaannut ingerlasut aamma takuneqarsinnaavoq.
Gaffeltruckit politiit biiliinit unitsinniarneqarput, truckilli politiit biiliinut aporpasittut aamma takuneqarsinnaavoq, truckillu kingorna ingerlaqqilerput kussinermullu naggataatigut nakkarlutik. Malik Olesen politiineersoq taama oqarpoq:
- Unitsitsiniaanermi politiit biilii ajoqusersimapput, kisianni inunnik ajoqusertoqarani. Ukua truckit kussinermut nakkarlutik unimmata aquttoq tigusarineqarpoq.
- Aallarussinermut inuk taanna pasillerneqarpoq, taava aamma misissorneqassaaq allanik unioqqutitsinermut pasillerneqassanersoq.
Politiit kalerrinneqarnerisa kingorna akunneq ataaseq qaangiummat truckit kussinermut nakkarput. Truckinik aallarussisoq politiinit tigusari, qanorpiarli pisoqarsimanersoq politiinit tamakkiisumik maanna misissorneqassasoq Malik Olesenip oqaatigaa.
