Politiit nittartakkatigut sioorasaarisarnerit ilungersornartuutippaat
Politikkerivut Nittartakkatigut naapittarfinni saassutarineqarnerpaanut ilaapput.
- Qinikkat tamat oqartussaaqataaneranni qinigaasut suliaat pissutigalugu sioorasaarneqartarneri sakkortuumik pinerlunneruvoq. taamaammallu tupinnanngitsumik taama ittut salliutittarpagut, qinikkammi suliassatik qinigaaffimminni sioorasaarneqaratik sulisinnaasariaqarput, Kalaallit Nunaanni politiini unnerluussisussaatitaaneq Morten Nielsen oqarpoq.
AAMMA ATUARUK Nunatsinni politikerit nittartakkatigut sioorasaagaasarlutillu malersugaasartut
Pisortani atorfilinnut politikkikkulluunniit suliaqartunut sioorasaarineq inunnut allanut siorasaarinermit sukanganerusumik pineqaatissiissutaasinnaavoq.
- Pisortani atorfillit illersugaanerupput, taakkumi sioorasaarneqaratik tamat sullissinnaasariaqarpaat, Morten Nielsen oqarpoq.
Nittartakkatigut toqqarluguluunniit sioorasaarinerit assigiinngisinneqanngillat
Nittartakkatigut aqqusinermiluunniit siorasaarinerit eqqartuussivinni assigiinngisinneqanngillat.
Inuulli politikeri sioorasaarsimappagu, tigussaasunillu upprnarsaateqarpat, taava sioorasaarisup pineqaatissinneqarsimasunut inissiivimmiittussanngornissaa unneerluussisussaatitaasut anguniartuaannaraat, unnerluussisussaatitaasut pisortaat Morten Nielsen oqaluttuarpoq.
- Qanoq siorasaarisimaneq apeqqutaasarpoq, siullermeeraannili ulluni 30-nit 60-inut sivisussusilimmik pineqaatissinneqarsimasunut inissiisarfimmiinnissamik eqqartuussaanermi kinguneqakkajuppoq.
AAMMA ATUARUK Niels Thomsen politikkimit tunuarpoq
Politikkikkut suliaqartunut sioorasaarinerit pineqaatissinneqarsimasunut inissiisarfiimmiittussanngortinneqarnermik kinguneqarsinnaasaraluartoq sioorasaarinissaq ilaasa tunuarsimaarfigineq ajorpaat. Politikkerit arlaqartut sioorasaarneqartarsimallutik KNR-imut oqaluttuarput, Demokraatillu siulittaasoriunnaagaata Niels Thomsenip politikkimit ataasinngormat tunuarnerminut siorasaarutit tunngavilersuutigai.
Akerartugaasarput
Politikkerit persuttarneqarnissamut sioorasaarneqartarnermik saniatigut aamma akerartugaasarput, soorlu assersuutigalugu pualanerarneqarlutik, sianilluanngitsuuneragaallutik politikkeriunerlunnerangaallutilluunniit. Taamaaliortoqartarneralu sakkukinnerusumik pineqaatissiissutaasarpoq.
Politikkerinut sioorasaarisarneq ilungersornartikkaluarlugit qanoq amerlatiginersut politiit taasinnaanngilaat, taamatullu pineqaatissiinerit aamma kisitsisaatiginagit.
