Nunatsinni politikerit nittartakkatigut sioorasaagaasarlutillu malersugaasartut
Politikerimik ataatsimik tunuartoqaqqippoq.
Niels Thomsen inuttut malersugaasaqattaarsimanini saassunneqarsimaninilu pissutigalugit Demokraatit siulittaasuattut ataasinngormat tunuarpoq. Tamakkuninngalu ajornartorsiuteqartuni kisiartaaqqajanngilaq.
Doris J. Jensen (S) oqaatsinik sakkortuunik imalimmik Facebookikkut sapaatip-akunnerani uani allagarsivoq:
Arnapalaavaraq, taannaqa takunissat! Isatseruloornissannut piareersimagina. Imminoqiit. Illaatigeruluuginnassavatsigit. Nuummukaqiit, Nuummi utaqqisaavutit!! Ilumuuissumik imminuuinnaqiit.
- Politikkikkut suliakka pissutigalugit taama saassunneqarnera siulliunngilaq, Doris J. Jensen oqarpoq.
Igalaaq aserorneqartoq
Tamannalu nalaassimasaani ajornerpaajunngilaq. Doris J. Jensen toqumik sioorasaagaasareerpoq, illumi igalaava aserorneqarnikuuvoq, ilaqutaalu arlallit saassunneqarnikuullutik. Politikkikkut suliai tunngavilersuutigineqartartut, Doris J. Jensen oqaluttuarpoq.
Ilaquttanilu taama sakkortutigisumik nakuuserfigineqarlutillu siorasaarneqartarnertik pissutigalugit ilumut politikeriuinnasanerluni isumaliutigisarini, inuttaata erseqqissarpaa.
AAMMA ATUARUK Niels Thomsen politikkimit tunuarpoq
- Siunissami ilumut politikeriuinnassanerlunga soorunami isumaliutigisarpara, qinigaagamali qinigaaffiga naallugu suliniarpunga, inuttaa oqarpoq.
Doris J. Jensen taama nalaataqartartuni kisiartaaqqajanngilaq. Demokraatit siulittaasorisimasaat Inatsisartunilu ilaasortaasimasoq, Randi Vestergaard Evaldsen, nalaataqarnikuungaatsiarpoq, tamannalu allamik inuussutissarsiuteqalernissaminik aalajangerneranut sunniuteqartoq, Randi Vestergaard Evaldsen oqaluttuarpoq.
Tasiilap oqallisaaleruttornerani meeqqanik sumiginnaasuuneragaavoq.
Aluu illakulujasooq, meeqqat sumiginnakkasi qanoq ippat?
allagarsiarisimasaa taama imaqarpoq.
- Ilaannikkut arajutsinaveersaarnartorujussuusarpoq. Politikeritut sulinera taama naleqartigisutut naggataagut misinnarunnaarmat, inuuninni nutaanik misilitassarsiussallunga aalajangerpunga, taanna oqarpoq.
Oqapiluutit
Pele Broberg (PN) taama aamma pineqarnikuuvoq. Suliat aalajangersimasut pillugit oqaaseqannginnissaminut inunnit kimigiiserfigeriarneqartarsimavoq.
- Politikeriujunnaaruma namminersorlunga inuussutissarsiulissagaluaruma akornutaasinnaasunik qasserpassuariarlunga oqapiffigineqartarpunga. Isummiussaqarnissannut anusinngorsariagaasarlunga, inuttaa oqarpoq.
Pualasooraa qaajanngusartoq sanigorsilaarnissat ukkatarigallaat
Politikerit ataaseq isumaqatigiissutigeqaat.
- Nunatsinni politikeriuniaraanni maattuujusariaqarpoq, Randi Vestergaard Evaldsen oqarpoq.
Pele Broberg tapersiivoq.
- Politikkikkut sulinermi peqataaleraangatta allanit maattuujunerulaartariaqartarpugut, inuttaa oqarpoq.
AAMMA ATUARUK Borgmester chikaneret fra posten
- Nunami tamat oqartussaaqataaffigisaanni inuuvugut, eqqissilluta ataqqineqarlutalu sulinissarput pisariaqartipparput, Randi Vestergaard Evaldsen oqarpoq.
Politikeriujunnaarnikuuvoq, innuttaasunulli kaammattuuteqarpoq.
- Taama iliornerit - politikerinuinnaanngitsoq - allanulli aamma qanoq sunniuteqartartiginersut innuttaasut eqqarsaatigilluartariaqarpaat. Oqalliseriaaseq inummut ataasiakkaamuinnaq ilaqutaanulli aamma tamanut sunniuteqartarpoq. Inuppassuit tamanna puigortarunarpaat, Randi Vestergaard Evaldsen oqarpoq.