Politiit Nanortalimmi toqutsineq pillugu suliamut tunngatillugu ilisimannittussarsiortut
Arnaq 65-inik ukiulik Nanortalimmi silami februaarip 18-iani sapaammi ullaakkut nassaarineqarpoq. Politiit oqarnerat naapertorlugu toqunerani ”pasinartoqarpoq”.
Tamatuma kingunitsianngua angut 27-nik ukiulik Nanortalimmeersoq tigusarineqarpoq arnamillu toqutsisutut pasineqarluni. Naalli taanna toqutsinermi pinngitsuuneraraluartoq ulluni 28-ni tigummineqarallartussanngortinneqarpoq.
Pisoqarneranit sapaatip akunnera qaangiuttoq Annertuumik pinartoqartillugu missueqqissaartarfimmi National Kriminalteknisk Centerimi Toqusoqarsimatillugu Misissuisarfimmi sulisut Kalaallit Nunaanni Politiit suliamik misissueqqissaarnerannut ikiuukkiartorlutik Nanortalimmiipput.
Suliami annertuumik suli misissuisoqarpoq, taamaammat politiit innuttaasunik februaarip 18-iani sapaatip unnuaani imerniartarfimmi Kap Farvelimiissimasunik attaveqarfeqarusupput.
Kalaallit Nunaanni Politiit tusagassiuutinut nalunaarummi allapput.
Arfininngornermi unnuap qeqqata missaanit sapaammi ullaakkut sisamat missaata akornani imerniartarfiup matunissaata tungaanut imerniartarfimmiissimaguit – imaluunniit suliamut atatillugu allamik paasissutissaateqaruit – Kalaallit Nunaanni Politiinut 70 14 48 attaveqarsinnaavutit.
