Nunatsinni politiit nakkutilliisullu aningaasarsiaqarnerulernissaannut isumaqatigiinniarnerit aallartittut
![Rigspolitiet](/sites/default/files/styles/image_934x467/public/article_images/politiuniform_foto_rigspolitiet.jpg?itok=vDswtKjI)
Danmarkimi inatsiseqarnermut ministerip, Inuit Ataqatigiit aamma Siumut 49,2 millionit koruunit nunatsinni inatsisinik atuutsitsinermi suliassaqarfimmut agguaanneqarnissaat pillugit Folketingimi isumaqatigiinnialeruttorput.
Aningaasat taakkua amerlanerpaartaat Kalaallit Nunaanni Politiit aamma Pinerluttunik Isumaginnittoqarfiup ataanni atorfillit aningaasarsiaqarnerulernissaannut matussusiissutaassapput.
AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut
49,2 millionit koruunillu 66,66 %-ii pinerluuteqarsimasunut inissiisarfinni nakkutilliisunut sinnerilu tassa 33,33 %-ii Kalaallit Nunaanni Politiinut agguaanneqarnissaat isumaqatigiinniarnerni maannamut aalajangerneqarallarsimasoq, KNR-ip tusamisaarpaa.
Tamanna nunatsinni pinerluuteqarsimasunut inissiisarfinni nakkutilliisut Danmarkimilu parnaarussivinni nakkutilliisut akissarsiaasa nikingassutaat nunatsinni politiit Danmarkimilu politiit akissarsiaasa nikingassutaannit annerujussuunerannik pissuteqarpoq.
49,2 millionit koruunit eqqartuussisoqarnermut aningaasaliissutigineqartut ukiunut sisamanut agguaanneqarput
2020: 10 mio.
2021: 13,2 mio.
2022: 13,7 mio.
2023: 12,3 mio.
Paasissutissanik pissarsiffik: Aningaasaqarnermut ministereqarfik
Nunatsinni politiit nakkutilliisullu aningaasarsiaqarnerulernissaat Kalaallit Politiivisa Peqatigiiffiata, Parnaarussalerisut Kattuffiata nunatsinnilu politikerit ukiorpassuarni kissaatigaat.
- Angusarput angeqaaq, aningaasarsiaqarnerulernissaammi piviusunngortipparput, Aaja Chemnitz Larsen oqarpoq.
Aningaasat agguataannissaannut isumaqatigiinngitsut
Danmarkip naalakkersuisui, Siumut IA-lu 49,2 millionit koruuninik nunatsinni inatsisinik atuutsitsinermi suliassaqarfimmut immikkoortitsinissamik Folketingimi ukiaq isumaqatigiipput.
IA-li Siumullu aningaasat qanoq agguaannissaannut kingorna isumaqatigiikkunnaarput.
Aningaasat amerlanerpaartaat Kalaallit Nunaanni Politiit aamma Pinerluttunik Isumaginnittoqarfiup ataanni atorfilinnut atorneqassasut, IA-p kissaatigaa, aningaasanilli suliniutinut allanut, soorlu pinerluuteqarsimasunut inissiisarfinni nakkutilliisutut ilinniakkap sivitsorneqarnissaanut amerlanerusunillu meeqqanut illersuisoqalernissaanut, aamma immikkoortitsisoqartariaqarsoraa.
AAMMA ATUARUK Qaammammut 7500 koruunit: Kalaallit nakkutilliisut danskinit akissarsiakinnerupput
Siumulli taamaaliornisamut akerliuvoq.
Pinerluuteqarsimasunut inissiisarfinni parnaarussivinnilu nakkutilliisut akissarsiaat
- Nunatsinni pinerluuteqarsimasunut inissiisarfimmi nakkutilliisutut ukiut marluk angullugit atorfilik tapisiat aalajangersimasut ilanngullugit agguaqatigiisillugu 19.365 koruuninik qaammammusiaqartarpoq.
- Danmarkimi parnaarussivimmi nakkutilliisutut ukiut marluk angullugit atorfilik tapisiat aalajangersimasut ilanngullugit agguaqatigiisillugu 24.769 koruuninik qaammammusiaqartarpoq.
Paasissutissanik pissarsiffik: Pinerluttunik Isumaginnittoqarfik
- Isumaqatigiissutivulli malillugit 49,2 millionit koruunit nunatsinni politiit pinerluuteqarsimasunullu inissiisarfinni nakkutilliisut aningaasarsiaqarnerulernissaannut matussusiissutaasussat naammaqqajanngillat, tamannalu ajornartorsiutaavoq. Taamaattumik isumaqarpunga, aningaasat taakkua isumaqatigiissutivut malillugit atorluartariaqarivut, Aki-Matilda Høegh-Dam oqarpoq.
Ataatsimoortumik isumaqatigiissusiornissaq kinguartittariaqartoq
Nunatsinni politiit pinerluuteqarsimasunullu inissiisarfinni nakkutilliisut isumaqatigiissutaat Danmarkimi suleqataasa isumaqatigiissutaannit allaanerupput.
Tamannali nunatsinni politiit nakkutilliisullu Danmarkimilu suleqataat Danmarkip naalagaaffiata ataani tamarmik atorfeqarmata ukiorpaalunni isornartorsiorneqartarpoq. Aningaasarsiaasali nikinganerat isumaqatigiissutissami aaqqiissuteqarfigineqassanngilaq.
- Nunatsinni politiit nakkutilliisullu isumaqatigiissutit Danmarkimi politiinut nakkutilliisunullu atuuttut malillugit aningaasarsiaqartitaasalernissaat, taakkualu tamarmik sapinngisamik assigiimmik aningaasarsiaqalernissaat kissaatigaarput. Pingaaruteqarporli angusaqarluarnitta eqqaamanissaa, Aaja Chemnitz Larsen oqarpoq.
Taarsiulluguli Kalaallit Nunaanni Politiit aamma Pinerluttunik Isumaginnittoqarfiup ataanni atorfillit sulinermi atugaat ukiup matuma ingerlanerani isumaqatigiinniarnerni ataatsimoortumik isumaqatigiissusiornissaq, Aaja Chemnitz Larsenip Aki-Matilda Høegh-Damillu neriuutigaat.
AAMMA ATUARUK Danskit naalakkersuisuisa inissiisarfinni sulisussaaleqineq aaqqiissuteqarfiginiarsariniaraa
Kalaallit Nunaanni Politiit aamma Pinerluttunik Isumaginnittoqarfiup ataanni atorfillit qanoq aningaasarsiaqarnerulertigissanersut suli ilisimaneqanngilaq. Isumaqatigiissulli 2020-mi januaarip aallaqqaataa aallarnerfigalugu atuutilerumaartoq, IA-p kissaatigaa.
Isumaqatigiinniarnerit suli naammassineqanngimmata Kalaallit Politiivisa Peqatigiiffiat Danmarkimilu Parnaarussalerisut Kattuffiat tamanna pillugu oqaaseqarusunngillat.