Politiit: Isumannaatsumik qaqqittaritsi

Qaqqinniaraanni asimukarniaraanniluunniit isumannaannissamut atortunik nassataqarluarnissaq, atisaqarluarnissaq atisassamaateqarnissarlu Nuummi politiit tamanut kajumissaarutigaat.

Politiit taama kajumissaarisariaqarnerannut pissutaavoq, arnat 30-nik 50-llu ukiullit Nuummi Ukkusissamiit ulloq unnuarlu sinnerlugu angerlarsinnaajunnaarsimammata.

Arnat taakku marluk, Nuummut nooqqammersut, pisuttuarniarlutik Ukkusissamut pingasunngormat ulloqeqqata siorna pisuttuarlutik aallarsimapput.

Silarluliutitikkamik silagissitsiiniarlugu unnuaq naallugu utaqqigaluarput, qiiaqalutilli.

Pingasunngormat unnuakkut tallimat inuinnarlugit kiappoq, qiiavallaarumanatillu allatut ajornartumik nikorfallutik pississaartariaqarsimapput.

Sisamanngormat sila taamaaginnarmat ammukarniarsareqqiinnalerput.

Nuummi politiit arfineq marluk arnanik taakkuninnga sisamanngormat ullaakkut ujaasillutik aallartipput, imminnulli takkuitsoorsimapput, pujorpallaarnera silarlunneralu pissutigalugu imminnut avaqqutiinnarsimallutik.

Arnat ajoratik namminneq apuussimapput, Nuummili politiit pisortaata, Bent Heiselbergip, inuit kajumissarpai asiarniarunik – pingaartumillu qaqqinniarunik - isumannaallisarluaqqaarlutik taamaaliortaqqullugit.

- Kalaallit Nunaanni qaqqat imaannaanngitsorsuupput, ataqqilluinnartussaavavullu. Qaqqinniarluni aalajangeraanni oqarasuaammik angallattakamilluunniit nassaraanni ajunnginnerpaasinnaavoq, Bent Heiselberg oqarpoq.