Rasmus Lyberth Folkemusikkens Hall of Fame-mut ilanngunneqalersoq
Siornatigut taamaallaat sisamariarluni taassuminnga nersornaasiisoqarsimavoq, tallimassaanillu Kalaallit Nunaanni nipilersortartut tusaamasat ilaat nersornaaserniarneqarpoq.
Rasmus Lyberth Folkemusikkens Hall of Fame-mut qaammat tulliani ilanngunneqalerpoq.
Maria Theessink, Tønder Festivalimi ulluinnarni ilitsersuisartutut aqutsisoq tusagassiuutinut nalunaarummi taama ilisimatitsivoq.
- Folkmusikkens Hall of Fame Tønderimiittoq tallimassaanik eqqumiitsuliortumik, danskit nunallu tamalaat folk- aamma roots-nipilersoriaasiannut sunniuteqarluarsimasumik ilaasortaqalerpoq. Tamatumuuna kalaallimik erinarsortartumik, taalliortartumik isiginnaartitsisartumillu tassaasoq Rasmus Lyberth.
Tusagassiuutinut nalunaarummi Kalaallit Nunaat pillugu ilisimasaqarneq Rasmus Lyberthip erinarsuutini atorlugit nunarsuarmut siaruarterisimanera immikkut erseqqissarneqarpoq.
- Nipini tiguartinnartoq atorlugu nunami pinngortitaa, ineriartornera innuttaasullu atugaat pillugit erinarsorpoq, oqaatsinik paasinninniarnermi akornutaasinnaasut tamaasa qaangerlugit - Londonimi Royal Albert Hallimi tusarnaartitsigaluaruni imaluunniit Tønder Festivalimi tupermiikkaluaruniluunniit.
Nersornaat 2021-mi Tønder Festival Fondimit pilersinneqarpoq.
Ukiuni siullerni marlunni Povl Dissing aamma Niels Hausgaard nersornaasiinermut tassunga ilanngupput. Nersornaat ukiuni kingullerni marlunni Irlandimi eqqumiitsuliortunut Finbar Fureymut aamma Eleanor Shanleymut tunniunneqarluni.
