- Masannaqaaq.

Taamak Lisa Germany KNR-imi tusagassiortup Arctic Circle Trailikkut pisuttuarnera qanoq issimanersoq pillugu aperimmani taamak akivoq. 

Sisimiut Kangerlussuullu akornanni aqqutikkut avannarlikkut 160 kilometerinik isorartutigisukkut annerusumik minnerusumilluunniit ATV-it aqqutaatigoorluni septembarimi pisuttuarfigaa. Kingullermik pisuttuarfigigamiuk 2018-imiuvoq – taamanerniillu allannguuteqarsimaqaaq.

- Assigiinngissusaanut tupaqqaqaanga. 2018-inut sanillillugu aqqutaa allanngorluinnarsimavoq, taanna oqarpoq.

Pissutaasut ilagaat taamanimiilli siallingaatsiartarsimanera, taamaalilluni aqqutaata ilaani masannartorujussuakkoorlunilu masarlulerujussuakkoortariaqartarneq.

Lisa Germanyp kingullermik Arctic Circle Trailimi avannarlikkut pisuttuarami 2018-imiuvoq. Taamanikkut massakkumut sanilliullugu aqqutaa panernerullunilu aqqutigiuminarneroqaaq. Assi © : Lisa Germany

Tamanna Lisa Germanyp Arctic Circle Trailimi ’trails manager’-iusup pisuttuartartunit tusartarsimavaa.

- Allatut takorloorsimagaluarpara. Piviusumilli takullugu ajornerujorujussuuvoq, taanna oqarpoq.

Taamaammat Arctic Circle Trailip nittartagaa allanngortiterlugu aallartippaa, pisuttuartarfiup aqqutaata nassuiarneqarnera piviusumut assingunerulerniassammat.

Aqqutaatami iluaallakkiartornissaa taassuma ilimaginngilaa.

Arctic Circle Trail avannarlikkut kujallikkullu aqquteqarpoq. Aqqut avannarleq pisuttuarfigineqakkajunnerusarpoq.  Assi © : arcticcircletrail.gl

- Aasami erngup nunamiittup aalanngornissaanut nillerpallaartarnera pissutaasoraara. Aamma aasat tamaasa siallikulanerulernera, taanna oqarpoq.

Taamaattumik aqqutip aserfallatsaaliornissaanut aningaasat amerlanerusut sulisussaqarnerunissamullu immikkoortitsisoqarsinnaanissaa taassuma neriuutigaa.

Aqqummi masattoq kisimi ajornartorsiulertitsinngilaq.

Equutissiat naasullu tummaarineqarnikut

Lisa Germanyp Arctic Circle Trailikkut pisuttuartartut ukiut tamaasa 2000-t missaaniissangatippai, naak tikerartartut amerlassusivii naatsorsoruminaakkaluartoq.

Taamaattuaannarnikuunngikkaluarpormi, taanna erseqqissaavoq.

Ukiut ingerlanerini pisuttuarfigineqartartoq taanna ukiunik 50-ingajannik pisoqaatigisoq ineriartortinneqarlunilu iluarsartuunneqartarpoq, pisuttuartullu unnuiffigisinnaasaannik illuaraliortitertoqarnikuulluni – kiisalu aqqutaa nalunaaqutsersorlugu inussuliortiternikuupput. Nunatta pisuttuarfissatut amerlaneruleraluttuinnartut takusaleriartuinnarpaat.

- Kalaallit Nunaat angalaffissatut nuannarineqarneruleraluttuinnarpoq, angalanissamut nittartakkani arlalinni aqqut aamma taaneqartarpoq, Lisa Germany oqarpoq.

Arctic Circle Trailikkut pisusstuartartut 10 prcentiisa missaai nunatsinneersuussarput. Amerlanerpaartaat Europameersuullutik.  Assi © : Pernille Brandborg Hjøllund

Kisiannii sialuttuulli aqqutip nuannarineqarnera unammillernartoqalersippaa.

Eqqakkat equutissiallu annertusigaluttuinnarneri ajornartoriutaangaatsiartoq, Arctic Circle Trail pillugu siorna apeqqutinik akisassartalinnik immersugassami erseqqissaatigineqarpoq.

Tamatuma saniatigut inuppaat takornarialerisumik angallanneqartut arlallit pissutigalugit, pisuttuartartut nipaatsumi eqqissinartutut misigisassatut neriuutigisimasaraluat akornuserneqartartoq misigisarpaat.

Aamma kamippaat 2000-it ukiut tamaasa inuit aqqutaatigut masattukkut pisuttuartoqarneranik, pinngortitap ajoquserneqarnerata pinngitsoortinneqarnissaa ajornakusoorpoq, Lisa Germany erseqqissaavoq.

- Aqqusinermi masatsillugu amerlasoorpassuit uiarteriniartarput, taamaaliortarnerilu paasisinnaalluarpakka. Kisianni tamanna aqqutit eqqaanni naasoqassutsimut malunnaatilimmik sunniuteqarpoq, taanna oqarpoq.

Ajornartorsiutit allanut nuuttut

Aqqutit masattut masarluttullu aornartorsiutaasut aaqqiiviginiarlugit, aqqut avannarlikkut immikkoortut ilaat allannguiffigineqarsinnaavoq, Lisa Germany oqarpoq.

- Tamanna aningaasanik sulisussanillu pisariaqartitsiviuvoq, taanna oqarpoq nangillunilu:

- Aamma aqqutikkut kujallikkut pisuttuarnerup naammassinissaanut ajornannginnerulersinneqarsinnaavoq, maanna pinngoqqaataatut avannarlikkut pisuttuarfigineqartartoq.

Kisianni tamanna aamma aningaasanik sulisussanillu pisariaqartitsiviuvoq.

Taamaatsiinnarlugu iliuuseqarfiginagu pingajuattut periarfissaavoq. Kisianni aqqutip tusaamanerlunneqalerneranik, inuillu allamut pisuttuarfissarsiortalernerannik kinguneqarsinnaavoq, Lisa Germany erseqqissaavoq. Assersuutigalugu Nuummut, Nuup Kapiliullu akornanni pisuttuartarfiup qanittukkut malunnartinneqartumut. Aqqut taanna panertuuvoq.

- Kisianni taanna kamippannik 2000-nik ukit tamaasa pisuttuarfigineqarneq ajorpoq, Lisa Germany oqarpoq nagillunilu:

- Ukiut sisamat qaangiuppata, aqqut taanna uagut maanna unamminartorsiornitsituulli unamminnartorsiorfigineqalissaaq.

Kangerlussuarmiit Sisimiunut pisuttuarnissaq amerlanerpartaat toqqartarpaat. Arctic Circle Trailip killiffimmik nalunaarusiaani 2024-meersoq naapertorlugu, Sisimiuniit Kangerlussuarmut pisuttuartartut 10 procentiinnaapput.  Assi © : Birgitte Kjeldsen

Arctic Circle Trailimi unamminartut isumagineqarnissaannut suliniutit aalajangersimasut suliarineqalertornissaat Lisa Germanyp neriuutigaa. Pingaarnertut neriuutigaa, illuaqqat aserfallatsaaliorneqarnissaannut, eqqakkanik katersinermut, pisuttuartartutut misilittagaqanngitsunut pingaarutilinnik paasissutissanik ingerlatitseqqiinissamut aningaasanik amerlanerusunik tunniussisoqarumaartoq, aamma Arctic Circle Trailip amasannarnerpaaffiini uiarteriffiusinnaasunik ajunnginnerusunik ujartuinissaq.

- Taanna Kalaallit Nunaanni takornarniat ornigarluarnerpaasartagaasa ilaanniippoq – paarilluartariaqarparput Lisa Germany oqarpoq.