Droneqarneranik pasitsaassineq pissutigalugu Oslomi timmisartuussinerit akornuserneqartut

Sapaatiummat unnuakkut Norgemi Oslop mittarfiani Gardemoenimi dronenik takunnittoqarsimasinnaanerata kingorna timmisartut arlallit kinguaattoorput, allallu angalaffissaat allanngortinneqartariaqarlutik.

Taama Norgemi nutaarsiassaqartitsivik NTB allappoq.

- Norwegian-ip timmisartuutaani timmisartortartoq mikkiartornermini dronenik takunnissorimmat nalunaaqutaq 00.16 nalunaarfigineqarpugut, Øst politidistriktimi pisortaq Gisle Sveen NTB-mut oqarpoq.

Takunnittoqarsimanera uppernarsarneqarsimanngilaq, taamaattumillu droneqarsimanera oqaatigineqarsinnaanngitsoq politiit erseqqissaapput.

Timmisartumi inuttat politiinit maanna apersorneqartut oqaatigineqarpoq.

Gisle Sveen naapertorlugu dronet pingasut tallimallu akornanniittut tassani takuneqarsimapput.

- Taama amerlatigisut oqaatigineqarpoq, uppernarsarneqanngilarli. Qanorluunniit ikkaluarpat suliaq pimooruttariaqarparput.

Kaajallaasut

Flightradarip nalunaarsorsimaffia naapertorlugu unnuap qeqqata kingorna timmisartut arlallit mittarfiup kujataatungaani kaajallaasut takuneqarsinnaasimasut, NTB allappoq.

Oslomi mittarfik sapaatiummat unnuakkut nalunaaqutaq 01.30 missaani nalinginnaasumik ingerlaqqilerpoq. Avinor, Norgemi mittarfinnik arlalinnik ingerlatsisoq, NTB-p tamanna pillugu saaffiginninneranut ingerlaannaq akissuteqarsimanngilaq.

Oslomi unnuaq pisoq Europami silaannakkut angallannermi akornusersuinerit kingullersaraat. Dronet takuneqarsimasut pissutigalugit ilaatigut Københavnip Aalborgillu mittarfii matuneqarnikuupput.

Septembarip 23-ani mittarfiup eqqaani dronenik takunnittoqarsimasinnaanera pissutigalugu Oslop mittarfia nalunaaquttap akunnerini arlalinni matuneqarpoq.

NTB naapertorlugu aamma illersornissaqarfiup timmisartoqarfiani Ørland-imi Nordsømilu uuliasiorfimmi Sleipner-imi droneqarsimasinnaavoq.

/ritzau/