Siulittaasoq: Polar Seafoodip ukiuni 32-ni oqaluttuarisaanerani pisoq ajornerpaaq

- Sapaatit akunneri kingulliit Polar Seafoodip maanna ukiuni 32-inngortuni ingerlanermini aqqusaagaasa ajornerpaartaraat.

Suliffeqarfissuup siulersuisuini siulittaasup Henrik Lethip, arnap islandimiup Birnap toqutaaneranut atatillugu kilisaatip Polar Nanup akuutinneqarnera pillugu tusagassiorfinnut nalunaarutini taama aallarnerpaa.

- Islandimi alianartumik pisup suliffeqarfik tamarmiusoq aalassatserujussuarpaa, apeqqutaanani tigummigallarneqartup akisussaasuunera - imaluunniit naamik. Tamannami eqqartuussivimmit aalajangiiffigineqassaaq, uagullu eqqartuussiveqarfik 100%-imik tatigivarput, Henrik Leth taama allappoq.

20-nik ukiullip Birna Brjánsdóttirip toqutaasimasorineqarneranut atatillugu suliami, kilisaammi Polar Nanumi inuttat marluk politiinit tigusarineqarput.

Kingorna inuttap aappaa iperagaavoq, taannalu Nunatsinnut angerlareerpoq. Inuttap aappaa Reykjavikkimi suli tigummigallarneqarpoq.

Suliaq aallartippoq Birna Brjánsdóttir arfininngornermi januaarip 14-iani ullaassakkut periarfeerunneqarmat. Reykjavikkimi paqqusinermi pisuinnartarfimmi Laugavegurimi nal. 05:25 kingullermik takuneqarpoq.

Annertuumillu ujaarineqareersoq arnap timaa toqungasoq Islandip illoqarfiisa pingaarnersaata avataatungaani sissami sapaatit-akunnerat ingerlareersoq nassaarineqarpoq.