Polar Seafoodip maalaarutaa itigartinneqarpoq
Kilisaatip Polar Aassiup kivineraniit qaammatit arlalissuit qaangiutereerput. Maannalu kilisaat Qasigiannguit avataani 300 meteritut ititigisumiilluni.
Kilisaalli unginngaqqissaaraluartoq, pisimasoq Polar Seafoodip piginnittutut kiisalu Avatangiisinut Naalakkersuisoqarfiup akornanni isumaqatigiinngittoqalerpoq.
Ingerlatsiviup umiarsuaq uuliamik imaaneqarnissaa juunimi piumasaqaatigineqarpoq, tamana aasap ingerlanerani ingerlatsiviup maalaarutiginikuuaa.
AAMMA ATUARUK Naalakkersuisut: Polar Aassik qaqinneqassanngilaq
Maalaarutigineqarnerata kinguneranik suliassaq unitsinneqarnikuuvoq, ataatsimiititaliap suliaata naammassinissaa utaqqillugu. Maannalu tassa suli umiarsuaq uuliaajarneqarnikuunani.
Maannakkulli Polar Seafoodip maalaarutini Avatangiisit ilersornissaat pillugu ataatsimiititaliamit suliarineqarusunngimmat ajuusaarnartumik inissilluni.
Ataatsimiititaliami siulittaasoq, Pipaluk Lynge Rasmussen (IA), taamatut nalunaarpoq. Aalajangiinerli pillugu siulittaasoq KNR-imit apersorneqarusunngilaq, Avatangiisilli pillugit Naalakkersuisoqarfimmiit aalajangiineq pillugu KNR nalunaarfigineqarpoq.
Naalakkersuisoqarfik: Uulia peerli, imaluunniit umiarsuaq peerli
Aalajangiinermi pingaartinneqarpoq, maalaarutip tigunerata kingorna, Avatangiisinut Naalakkersuisoqarfiup inerteqqussummik nutaamik nalunaaruteqarnikuunera. Tamanna pivoq apriilip 20-at, Inerteqqusissummi allassimavoq, oktobarip 30-at tikitsinnagu imarlu sikutinnagu, umiarsuaq uuliamik imaarneqassasoq. Taamaanngkippat kilisaat sumiiffimmiit peerneqassasoq aalajangerneqarpoq.
Polar Seafoodili aperigaanni, uulia peerneqarsinnaanngilaq. Aalisarnermik ingerlatsivik immap ataatigut droninik misissuinermini paasivaa, tankit iliuuseqarfigineqarsinnnaanngitsut.
Naalakkersuisoqarfiulli kingullermik inerteqqusiinermini tamanna aamma sunniuteqartippaa.
AAMMA ATUARUK Polar Seafoodip kilisaammi kivinikumi uuliamik imaarsaaqquneqarnertik naammagittaalliuutigaa
Imatut allassimasoqarpoq: Uuliap piiarneqarsinnaannginnera imaluunniit suliarinerani ulorianartoqarpallaarnera pissutigalugu tamatuma sapernarnera Polar Seafoodip uppernarsassavaa, ingerlatsivillu allatut iliuuseqarluni ”annerusumik mingutsitsisoqannginnissaa qulakkeertariaqarlugu.
Ingerlatsivilli qanoq iliuuseqarusuppa? Tamanna pillugu Polar Seafoodip pilersaarutini kingusinnerpaamik aggustip 15-ianni, tassa sapaatiuppat, aalajangiiffigissavaat.
Ingerlatsiviullu tamanna naammasserusuppaa. Taamatut Henrik Leth, Polar Seafoodimi siulersuisut siulittaasuat oqarpoq, tamatumali saniatigut allamik oqaaseqaateqarusunnani.
Uulia 50.000 literi
Kilisaat Qasigiannguit avataanni immap naqqaniippoq. Qaammatillu pingasut matuma siorna marsip 17-ianni kivinerminiit tassaniinnikuulluni.
Tanatuma nalaani umiarsuaq uuliamik 50.000 literimik nassataqarpoq, maannakkullu uulia anialluni immap qaavani siaruaannikuulluni.
Sømilit pingasut iluanni uuliamik mingutsitsinerit Kalaallit Nunaata nammineq isumagisussaavai – tassa aamma sineriammut qanittuni pisut – soorlu tassani Polar Aassiup kiviffiani.
AAMMA ATUARUK Polar Aassik immap naqqani napalluni uuliakoortoq
Mingutsitsinerli misissorniarlugu misissugassanillu tigooqqaaniarluni, Namminersorlutik Oqartussaniit Arktisk Kommando alaatsinaattussatut misissugassanillu tigooraasussatut ikiortiseraat.
Kilisaatip kivineraniit sivitsoreersoq, imap qaavani uuliaqarpoq, maannakkorpiarli umiarsuamiit uuliamik aniasoqarpasinngilaq. Juunilli naalernerani Arktisk Kommando nalunaarpoq, uuliamik aniasoqarpasinngitsoq.
Avatangiisinut Naalakkersuisoqarfiup pingaartutut isigaa, ”pinngortitami assut sunnertiasumi” sumiiffimmilu inuussutissarsiutigalugu aalisartarfimmi kilisaatip kivinikuunera.