Polar Seafoodip kilisaammi kivinikumi uuliamik imaarsaaqquneqarnertik naammagittaalliuutigaa

Namminersorlutik Oqartussat aprilip naanerani nalunaarput Polar Seafoodip juni naatinnagu Polar Aassimmi uulia imaarsassagaat.

Ingerlatsiviulli peqqussut imaaliallaannaq malinnianngilaa. Kilisaataatillimmi avatangiisit innarlitsaaliornerannut maalaarnermut ataatsimiititaliamut maalaaruteqarpoq.

Tamanna Polar Seafoodimi siulersuisuni siulittaasup Henrik Lethip KNR-imut uppernarsarpaa.

Ingerlatsivik naapertorlugu, uulia imaarsarneqarsinnaanngilaq.

- Annertuumik iliuuseqarsimavugut ilaatigut immap naqqaliartaatit dronet atorlutigit. Takusinnaavarpulli timi atorlugu tanket iserfigineqarsinnaanngitsut.

- Taamaattumik teknologi ullumikkut ilisimariigaarput atorlugu uulia tasamaniittoq puttallartissinnaasimanngilarput, oqarpoq.

Uulia immap naqqaniit qaqinneqartariaqarnera akisussaaffigalugu misigisimanngilatit?

- Imaanngilaq akisussaaffigerusunngikkipput, kisianniuna taamaaliortoqarsinnaanngitsoq, Henrik Leth oqarpoq.

Siulersuisut siulittaasuata apeqqutit arlallit aamma akiumanngilai.

Naammagittaalliutillu taamaalilluni inernerilerpaa, ataatsimiititaliap iliuuseqaqqinnissaata tungaanut suliaq uninngalluinnalissammat, taamaalillunilu aamma qaqugu suliarineqarnissaa aamma ilisimaneqarani.

Maalaaruteqarneq pissutaalluni suliassaq ataatsimiititaliap suliarereernissaanut unitsikkallarpoq. 

AAMMA ATUARUK Namminersorlutik Oqartussat kilisaat kivinikoq uuliaajaqqugaat

Kilisaat Qasigiannguit avataani immap naqqaniippoq. Qaammatit pingasut sinneqartut marsip 17-iani kivinerminiit tassaniilerpoq.

Taamani uulia 50.000 liiterit missaaniittoq umiarsuarmiippoq, ilaalu seerivoq immap qaavani siaruaalluni.

Kalaallit Nunaat sinerissap qanittuani sømiilit pingasut iluanni nammineq uuliamik mingutsitsinnginnissaq isumagisarivaa-

soorlu Polar Aassiup kiviffigisaani.

Namminersorlutik Oqartussalli mingutsitsinerup alaatsinaanneranut misiliutinillu aallernermi Issittumi Sakkutooqarfik ikiortiserisariaqarsimavaa.

Sapaatit akunneri marluk immap qaavani uuliaqanngilaq

Kilisaatip kivereernerani sivisuumik immap qaavani uuliaqarpoq, maannali sapaatit akunneri kingulliit marluk umiarsuup uuliakoorneranik takussutissaqanngilaq.

Taama oqarpoq Dan B. Termansen, Issittumi Sakkutooqarfimmi pisortap tullia.

- Ulluni 14-ini kingullerni immap qaani uuliamik siumuinngilagut. Erseqqivissumik oqarsinnaanngilagut seerisoqarunnaartoq, imaluunniit suli qangattartoqanngiinnarnersoq, taama oqarpoq.

Uulialli seerisimasup annertussusaa oqaatigiuminaappoq:

- Oqaatigiuminaatsorujussuuvoq. Naatsorsoruminaatsorujussuuvoq. Diesel uulia liiterit 50.000-it missaaniittoq umiarsuup kivinerani tankiniittuusimassangatipparput saniatigullu imerpalasumerngit smøre uulialu.

- Maannamut ilisimasagut toqqammavigalugit umiiarnikumi suli uuliqaangaatsiarnissaa ilimagaarput 

AAMMA ATUARUK Polar Aassik immap naqqani napalluni uuliakoortoq

Qanoq annertutigaa?

- Uulia suli liiterit 50.000-it missaaniissagunarpoq.Annikitsuaraannaq immap qaavani takuarput.

Qanillinerulaarsinnaaviuk? Uulia liiterit 100, 1000 iml. 5000?

- Naatsorsoruminaappoq, kisianni tamatuma missaaniissagunarpoq.

Piffissarititaasullu iluani kilisaatip uuliamik imaarnissaa imaannaanavinngitsoq, pisortap tulliata nalilerpaa:

- Suliassap naammassiuminaannissaanik ilisimatinneqarpugut, tassami kilisaat miiterini 300-ni ititigisumiippoq. Taamak ititigisumiit uuliamik maqitsineq sumiluunniit misilittagaqarfigineqarpianngilaq.

- Juunip 30-ani killiliisimaneq neriuppallaaluatsiarneruvoq. Suliassaq naammassiuminaatsorujussuuvoq, Dan B. Termansen oqarpoq.