Namminersorlutik Oqartussat kilisaat kivinikoq uuliaajaqqugaat

Kilisaat immap naqqani meterit 312-ini ititigisumi kivinikoq qanoq uuliaajagassaava?

Polar Seafoodip tamanna paasiniassavaa. Piginneqatigiiffiummi kilisaat raajarniut Aassik uuliamik useqarluni Qeqertarsuup Tunuata kujataani qaammat ataaseq sinnerlugu matuma siorna kivereerluni uuliakoortoq uuliaajassagaa, Namminersorlutik Oqartussat Polar Seafoodimut piumasaraat.

Avatangiisinut naalakkersuisoqarfik taama piumasaqarsimalluni uppernarsaavoq, kisianni sooq taamaaliorsimanerluni aamma piginneqatigiiffiup suliassasani naammassinngippagu sumik kinguneqarsinnaaneranik oqaaseqarumanani  nalunaarpoq.

AAMMA ATUARUK Kilisaat kivinikoq suli uuliakoortoq

Sømilinik pingasunik killeqarfiup iluani, tassa sinerissap qanittuani, uuliakoornernik saliineq nunatta akisussaaffigilernikuummagu Polar Aassillu tamaani kivinikuummat, Namminersorlutik Oqartussat saliinissamut akisussaasuupput.

Namminersorlutik Oqartussalli Issittumi Sakkutooqarfik uuliakoornermik nakkutilliinissamut misissuinissamullu ikiortiserisariaqarsimavaat.

- Umiatsianik umiarsuarnillu kiviffiani maannamut nakkutilliivugut. Tamannalu assilisaqattaarumallugu nakkutigiinnarumallugulu timmisartumik tamaaniisitsissaagut. Suliallu naammassinissaanut soorunami tamaaniiginnassaagut, Issittumi Sakkutooqarfiup pisortarigallagaa Dan B. Termansen oqarpoq.

Sillimmasiisarfiit millionilinnik akiliissangatinneqartut

Issittumi Sakkutooqarfiulli ikiuunnera aningaasartuutaavoq, kilisaammillu uuliaajaanissaq ilanngukkaanni millioninik marlunnik kisitsisitalinnik aningaasartuuteqarfioriaannaavoq.

Polar Seafood erseqqinnerusumilluunniit oqaatigalugu piginneqatigiiffiup taassuma sillimmasiisarfii akiliissangatinneqartut, Issittumi Sakkutooqarfik erseqqissaavoq.

- Immami mingutsitsisut saliinissamut akiliisarnissaat nunani tamalaani tungaviusumik isumaavoq. Taamaammat sillimmasiisarfik kilisaammut kivinikumut akisussaasuusoq tamatumunnga aningaasartuutitsinnik akileeqqussavarput, Dan B. Termansen oqarpoq.

Suliaq taanna sillimmasiisarfinnit akisussaaffigineqarmat, Polar Seafood piumasaqaat, uuliakoorneq akiligassarlu pillugit oqaaseqarumanngilaq. Suliarli iliuuseqarfigineqaleruttortoq, piginneqatigiiffiup siulersuisuini siulittaasoq oqarpoq.

- Qanoq iliortoqarsinaanersoq ilumulluunniit iliuuseqartoqarsinnaaneersoq sillimmasiisarfivullu misissorparput, Polar Seafoodip siulersuisuini siulittaasoq Henrik Leth oqarpoq.

Kilisaat Qasigiannguit avataanni marsip ulluisa 16-ianni kalitami immap naqqani kanngeqqanerani ingerlaartilluni ikuallalerpoq. Aqaguanili kaanngarami kimmut tissukalerpoq.

Polar Aassik marsip ulluisa 18-ianni kivisoq solaarimik kvadratkilomerit sisamanut siaruaattumik uuliakoorujussuarpoq.