Kilisaat kivinikoq suli uuliakoortoq
Polar Seafoodip kilisaataata kivinikoq, Aassik, immap naqqani meterit 300-t missaanni ititigisumiippoq.
Kilisaat ikuallareerluni marsip ulluisa 17-ianni kivivoq, Issittumi Sakkutooqarfimmeersullu kiviffiata nalaani qanoq uuliakoortigisimanersoq paasiniarlugu tamaani suli nakkutilliipput.
- Suli uuliakoornersoq nakkutigalugu umiarsuarmik alapernaarsummik, tassa Ejner Mikkelsenimik, kilisaatip kiviffiata suli nalaaniippugut, uuliakoqaraangallu kilisaammit tassanngaanneernersoq paasiniarlugu misissortartarput, Issittup Sakkutooqarfiata pisortarigallagaa Dan B. Termansen oqarpoq.
AAMMA ATUARUK Kilisaammit kivisumit uulia Qasigiannguit eqqaanni 4 kvadratkilometerit sinnerlugit siaruaattoq
Kilisaat kivinerminit solaariusamik kvadratkilomerit sisamanut siaruaattumik ullorpaalunni uuliakoorujussuarpoq. Solaariusap ilaa taamanili aalarluni nungukkiartorpoq, kilisaatilli kiviffiata nalaa issimmat aalarniaruusaarpoq.
Suli aaqqiissuteqanngitsut
Issittumi Sakkutooqarfimmeersut kilisaatip kivereernerani qanoq uuliakoortigisimanersoq paasiniarlugu qaammataasiamit assilisat najoqqutaralugit qulimiguulimmillu kivineranit ullorpaalunni siullerni nakkutigereerlugu uuliakoorunnaarsimarpasippoq. Solaariusamilli suli uuliakoortoq, ulluni kingullerni nakkutilliinerminni paasivaat.
- Ilimagisatsitut pisoqartoq uppernarsivarput, taamaammat Namminersorlutik Oqartussallu kilisaatip qanoq iliorneqarnissaanut aaqqiissuteqalertortariaqarpugut, Dan B. Termansen oqarpoq.
Kilisaat immap naqqaniiginnassanersoq mingutsitsineroqqunaguluunniit puttallartinneqassanersoq, Issittumi Sakkutooqarfik Namminersorlutik Oqartussallu aalajangissapput.
AAMMA ATUARUK Issittumi Sakkutooqarfik: Uuliamik mingutsitsisoqaqqinngikkallarpoq
Kilisaat solaariusammik 50.000 literit missaannik useqarluni kivisimasoq solaariusaallu ilarujussua suli seerisimanngitsoq, Issittumi Sakkutooqarfik ilisimatitsivoq.
Innuttaasut kilisaatip kiviffiata nalaani uuliakumik siumugaqarsimasut kalerriinissaat, Issittumik Sakkutooqarfiup kilisaat kivinikoq uuliakooqqaareersorlu ataasiaannarani kajumissaarutigaa, qanoq uuliakoorsimatigineranik qulaajaanerminut iluaqutigisaminik.
- Innuttaasut kalerriisarnerat sulinitsinnut iluaqutigeqigatsigit qujaruteqaavut, Dan B. Termansen suli taamaaliortoqartarnissaanik kajumissaaraluni oqarpoq.
Innuttaasut najukkaminni upalungaarsimasunut tassa qatserisartunut, politiinut kommunimulluunniit kalerriisassapput.