Issittumi Sakkutooqarfik: Uuliamik mingutsitsisoqaqqinngikkallarpoq

Kilisaammit kivisumit, Polar Aassimmit uuliamik aniatitsisoqarnera Issittumi Sakkutooqarfimmit nakkutigineqartuarsinnarpoq.

Qulimiguulimmit satellitsiminngaanniillu nakkutilliinerit Qasigiannguit eqqani immap uuliamik mingutsinneqaqqissimanera takutinngilaat.

Issittumi Sakkutooqarfimmi pisortaagallartoq, Dan B. Termansen KNR-imut taama paasissutissiivoq.

- Timmissat imarmiutallu uuliatitersimanersut misissorniarlugu qulimiguulik atorlugu ullumi misissuivugut, taamaattoqanngitsorlu paasivarput, Dan B. Termansen oqarpoq.

AAMMA ATUARUK Kilisaat kivinikoq: Ejnar Mikkelsen avannamukaarpoq Knud Rasmussen ikiussallugu

Kilisaat Polar Aassik ataasinngormat unnukkut ikuallalerpoq. Kilisaallu Qasigiannguit avataani pingasunngornermi kivivoq, tamatumalu kingorna uuliamik mingutsitsineq kvadratkilometerinik sisamanik annertutigisumi imaani siaruaappoq.

Umiarsuarmi alapernaarsuummi, Knud Rasmussenimi immap ataani aalasunik takussutissiisinnaasunik atortoqarput, taakkulu atorlugit kilisaat kivisoq immap naqqani sumiissusikannerneqarpoq.

Dan B. Termansenili naapertorlugu imaani sikoqarmat nillermallu uuliap aalannguunnissaata tungaanut sapaatit akunneri arlallit ingerlasinnaapput.

AAMMA ATUARUK Uuliamik aniatitsineq pillugu killiffik: Mingutsitsineq siaruaatinngikkallarpoq