Kilisaat kivinikoq: Ejnar Mikkelsen avannamukaarpoq Knud Rasmussen ikiussallugu

Kilisaammit kivisumit Polar Aassimmit uuliamik suli aniasoqarnersoq suli nalornissutigineqarpoq.

Issittumi Sakkutooqarfik tamanna pillugu umiarsuarmik alapernaarsuummik allamik kilisaatip Qasigiannguit avataanni kiviffiata nalaanukartitseqqilerpoq.

AAMMA ATUARUK Uuliamik aniatitsineq pillugu killiffik: Mingutsitsineq siaruaatinngikkallarpoq

Kilisaat ataasinngormat ikuallalerpoq, pingasunngormallu kivilluni.

- Umiarsuaq alapernaarsuut Ejnar Mikkelsen, coronavirusimit kujataani akiuussusiisoqarnissaanut ikiuereerluni Nuummi maanna usilersorneqarpoq, avatangiisinik saliisinnaanissamut atortunik usilersorneqarluni. Ejnar Mikkelsen kilisaatip kiviffiata nalaanut unnugu aallassaaq, uuliamimmi kilisaammit suli aniasoqarsinnaanera sillimaffigaarput, Issittumi Sakkutooqarfiup pisortarigallagaa Dan B. Termansen oqarpoq.

Dieseluulia saattoq

- Umiarsuaq alapernaarsuut Knud Rasmussen kilisaatip kiviffiata nalaaniippoq, Ejnar Mikkelsenilu ikiortigalugu kilisaammit uuliamik suli aniasoqarnersoq sillimaffigissavaat. Ulluni tulliuttuni tassaniissapput, qanorlu taava pisoqassanersoq sapaatit-akunnerata tulliata aallartinnerani naliliivigineqarumaarpoq, Issittumi Sakkutooqarfimmit oqarput.

AAMMA ATUARUK Issittumi Sakkutooqarfik aalisartunut: Piffinni allani uuliamik takugussi oqarisi

Suliarlu ulluni tulliuttuni tassa nanginneqassaaq:

- Timmisartoq Challenger atorlugu sapaatit-akunnerata naanerani qulaavaasoqassaaq assiliisoqartassalluni, qaammataasallu assilisaasa saniatigut Challengerip assilisai atorneqassallutik. Kilisaatip kiviffiata nalaanit sumiiffimmi allami uuliakoortoqarnersoq taamaasilluni nakkutigineqassaaq, Issittumi Sakkutooqarfiup pisortarigallagaa Dan B. Termansen oqarpoq.