Polar Nataarnaq ukioq manna aappassaanik aportoq: Tamatumuuna iluliamut
Apoqqippoq.
Ukioq manna Polar Seafoodip kilisaataa aappassaat aporpoq.
Tamatumuuna Polar Nataarnaq amutsivimmeereerluni nunatsinnukarnermini aporpoq.
- Kalaallit Nunaata kujataani putsup ataani kilisaat ilualiamut aporpoq, Polar Seafoodimi pisortaq, Bent Salling, taama KNR-imut nassuiaavoq.
Taassuma ilisimatitsissutigaa kilisaammi inuttat 13-it ajoqusersimanngitsut. Kilisaat maanna Savalimmiuni amutsiviliarpoq.
- Pisoq oqaluuserisimavarput aalajangerpugullu kilisaat amutsiviliaanneqassasoq siua iluarsaanneqarnerussammat. Imaani aalisarnissaa tamatta atorfissaqartipparput, Bent Salling oqarpoq nangillunilu:
- Inuttat oqaloqatigeqqaassagatsigit susoqarsimanera oqaatigisinnaanngilara, taanna oqarpoq ilanngullugulu oqaatigaa kilisaatip apornerani aquttarfia inuttaqarsimasoq.
Hashi 9 kiilu
Januaarip arfineq-aappaanni kilisaat Royal Greenlandip kilisaataanut Akamalimmut Maniitsup avataani aporpoq.
- Imarsiornerup iluani nunani tamalaani maleruagassat malippavut, inuillu kukkusinnaanerat 100 procentimik pinngitsoortissinnaanngilarput.
Sapaatit akunneri marluk suli qaangiutinngillat qimmip narajortartup Danmarkimi kilisaammi tassani hashi 4 kiilu nassaarimmagit. Ullut marlualunnguit qaangiummata, Sermitsiaq.AG naapertorlugu, Savalimmiuni politiit Polar Nataarnami hasimik 5 kiilumik nassaarput.