Pinngortitaliarninni sumiiffiup assinganik nassataqarsinnaalersutit
Nunatta sikoqanngitsortaata ilarujussua 2018-imit 2022-mut assiliartalersorneqarpoq. Tassani nunatsinni pinngortitami ajornaatsumik isumannaannerusumillu angalasoqarsinnaalernissaa ilaatigut siunertarineqarpoq. Klimadatastyrelsip sumiiffiup asserpassui pinngortitamut oqarasuaammi anillatsitatulluunniit nassarneqarsinnaalernissaat pillugu digitalinngorlugit pissarsiarineqarsinnaalernissaat suliareqqinnikuuaa.
- Sumiiffiup assingi inunnut assigiinngitsunut Kalaallit Nunaata pinngortitaani, sumiiffimmut tunngatillugu paasisimasaqarnissamut pingaaruteqartumi angalaartussanut iluaqutaasinnaapput. Taamaammat asserpassuit pissarsiarineqarsinnaalernerat nuannaarutigaarput, Klimadatastyrelsimi pisortaq, Rikke Hougaard Zeberg oqarpoq.
Klimadatastyrelsip assilialiornermi Asiaq nunatsinni nunamik assiliornermut aqutsisoqarfiusoq aamma illoqarfinnik nunaqarfinnillu assiliortuinermut akisussaasoq qanimut suleqatigaa.
Dataforsyningimit assit aakkit
Sumiiffiup assingi katillugit 2224-t suliarineqarput, taakkulu Dataforsyningimit aaneqarsinnaapput. Assit sumiiffinnut pineqartunut tunngasut PDF-inngorlugit aaneqarsinnaapput, taakkulu oqarasuaatikkut assilianik takutitsisinnaasumut imaluunniit pisuttuarnermut appimut ilanngunneqarsinnaallutik. Assilialiallu soorunami aamma tigummisinnaanngorlugit anillatsinneqarsinnaapput.
Sumiiffimmut assiliat innuttaasunut takornarianullu nunami ammaannartumi angalaarniartunut eqqortumik isumannaatsumillu tunngaviliinissaat ilaatigut anguniarneqarpoq:
- Pinngortitaleriffimmit digitalikkut assinik nalunaarusiornermut nittartakkatigullu atuingaatsiartarpugut, sumiiffinnullu interneteqarfiunngitsunut misissuiartoraangatta PDF-inngorlugit assiliat nutaat nassarsinnaalernerat ajornaannerulersitsissaaq, Pinngortitaleriffimmi Avatangiisinut Aatsitassanullu Immikkoortortaqarfimmi pisortaq, Karl Brix Zinglersen oqarpoq.
- Tunumi sumiiffiup assingi ukiorpassuarni siullermeertumik nutartikkamik saqqummertoqarpoq, tassanilu nunap aamma sermit iigartartut allannguuteqangaatsiarsimanera takutinneqarpoq. Tamanna pingaartumik takornariat nunap immikkoortuani sumiiffimmut atatillugu tutsuiginartumik paasissutissarserusuttut ujartuleriartuinnarpaat. DMO Visit East Greenlandimit assiliat tikeraanut nunaqavissunullu ajornaatsumik pissarsiarineqarsinnaalernissaat sulissutigaarput, taamaaliornikkut pinngortitamiinnermi paasissutissat pitsaasut nutartersimasullu atorneqarsinnaassallutik. Assit tikeraanut kisimik naleqartorujussuunngillat, aammali nunaqavissunut, taakku assini ulluinnarni angalasarnerminni takusartakkatik ilisarilluarsinnaavaat, Kommuneqarfik Sermersuumi takornariaqarnermi ataqatigiissaarisoq, Anna Burdenski oqarpoq.
Nunanut tamalaaneersunut paasissutissiineq
Sumiiffinnit assit tamarmik kalaallisut, danskisut tuluttullu paasissutissartaqarput.
Sumiiffimmi assit nunaannaq 1:50.000-iusoq assiliartalerpaat, taakku suliarinerat allanngorartumillu paasissutissartalersorneqarnerat suliarujussuuvoq. Sumiiffinnit assit ataasiakkaat atuisup UTM-net atorlugu assimi qanoq sumiissusersisinnaanermut ilitsersuut takusinnaavaa. Tamanna qaqqamiitsilluni ikiorneqarnissaq pisariaqartinneqalernissaanut toqqissisimanermik pilersitsissaaq.
Nunatta sermeqanngitsortaanik assiliartalersuineq Klimadatastyrelsenip, Asiap, Namminersorlutik Oqartussat, Illersornissamut ministereqarfiup, Atortussanik pisiniortornermullu aqutsisoqarfiup aamma A.P. Møller aamma Hustru Chastine Mc-Kinney Møllerip aningaasaateqarfiata suleqatigiinneratigut naammassineqarpoq.
