Piviusulersaarut nutaaq qivittulersaarnermik sammisalik
Margrethe Thårup Andersenip utoqqaat oqaluttuaqattaatsillugit piviusulersaarummik filmiliorsimavoq.
- Qulequtaqartippara Arnat qivittut issuminillu qilippallit allallu, siammasissorujussuarmik imaqarpoq, qivittulikkersaarutaavoq, akiniaanermik tunngassuteqarpoq, sorsunnersuulluni nalaani misigisimasat quujanarsinnaasut, piviusulersaarummik suliaqartoq Margrethe Thårup Andersen oqarpoq.
Aamma atuaruk Oqaluttuatoqqanik qivittulersaartunillu filmi nutaaq
Ersinartulikkersaattoqartillugu oqaluttuartoq tiguaalluarsimatilluni tassanngaanaq tupassaarisarpoq.
Tamannalu Margrethe Thårup Andersen Ilisimatusarfimmi ilaatigut atuakkialerinermik ilinniarnermini, atuakkatigut nipitigullu tusarnaartarnermini amigaatigisarsimavaa, tamannalu takutikkusullugu piviusulersaarusiorpoq.
- Misigisimavungalu takusassiat isiginnaagassiat, ussersornerit kiinaata pissusilersornera, annermullu aamma tusarnaartut tiguartissimariaraangamik oqaluttuartunut sunniiteqartarnera ersersikkusullgu.
Aamma atuaruk Nassuttuumigooq qivittoqarpoq
Titartakkami takutinneqarpoq issuminik qilippallit. Qanga akiniaasarallarmata, kanngunartumik toqutsiniarlutik kinguaassiutai kiperiarlugit
Margrethe Thårup Andersen ilinniarnerminut atatillugu 2008-mi immiussisimavoq. Allamilli suliaqalerami immiussani atunngimmagit apeqqutigineqaqattaarsimapput. Ullut ilaanni saqqummersissallugit aalajangerpoq. Nunafonden-imiit taperneqareerami piffissap sukkasuup iluani maanga killeriikatappoq.
- Taama annertitigisimik takorloorsimanngikkaluarpara, soorlu Katuami isiginnaagassianngornissaa eqqarsaatersuutigisimanngilara, dvd-tullu saqqummernissaa, Margrethe Thårup Andersen taama oqarpoq.
Kinguaariinut tamanut
Ersinartulikkersaattarneq inunnut tataattunut naleqquttuungilaq. Piviusulikkersaarulli "Arnat qivittut issuminillu qalippallit allallu", tamanut naleqquttuusoq, aamma danskisut tuluttullu ataatigut oqaasertalersugaasoq, filmiliornermi ilitsersuisoq oqarpoq.
- Kinguaariit tamarmik isiginnaarsinnaassavaat, soorunami oqaluttuatoqqat sakkortusiinnaasaraluartut tamanut tulluartippara, piviusulersaarummik suliaqartoq Margrethe Thårup Andersen taama oqarpoq.
Piviusulersaarut ukiortaap nalaani dvd-ngorlugu saqqummissaaq.
