Pitsaanerusumik meeraaneq piumavaat
Internetikkut atsiorit taamalu naalakkersuinermik suliallit oqaluttuullugit, meeqqanut atugassaritinneqartut pitsaanerusariaqartut.
Allattoq Elisa Isaksen
oktobarip 05-at 2007 06:26
Ulluni makkunani Internetikkut allagarsisarfiit aqqutigalugit taama kajumissaarisoqarpoq.
Internetikkut uunga isertoqarsinnaavoq: bedreboerneliv.skrivunder.dk, tassani kajumissaarinermut pissutaasut kalaallisut qallunaatullu allassimapput, atsiorfissaqarporlu.
- Asasavut nunatsinni politikerit.
Meeqqat atugaat ajorluinnarput - piffissanngorsorinarpoq nunatsinni meeqqanut atugassarititaasut salliutinneqarnissaat, nittartakkami taama allassimavoq.
Manna tikillugu nittartakkamut inuit 1.600-ut atsioreersimapput.
Atsiortitsineq novembarip 15-iata tungaanut ingerlanneqassaaq tamatumalu kingorna atsiornerit naalakkersuisunut kommunalbestyrelsinullu ingerlateqqinneqassapput. Internetikkut iserfissaq aamma knr.gl-imi nanineqarsinnaavoq.
