Inuit Ataqatigiit: Pisassiissutit ukiuni 15-ini atuuffeqalissapput
Pisassaat piffissaligaanngitsut, maannakkutut itsillugit, nutaamik agguaateqqinnissaat agguaanneqartarnerannullu periutsit inerisarnissaat ajornakusoorput, taamaanneralu IA-p apeqquserpaa.
- Taannalu soorunami aamma pisuussutit inuiaqatigiittut pigigatsigit, Inuit Ataqatigiinniit apeqquserparput, Sara Olsvig oqarpoq.
AAMMA ATUARUK IA aalisarnermut inatsisissakkut angusarissaarusupput pilersaarummili suli saqqummiussinngilaat
Pisassat ukiuni tallimani atuuttarnissaanik siusinnerusukkut siunnersuutaasoq aningaasaliisartut aningaasaliinissamut toqqissisimanissaanut sivikippallaartoq, IA-p siulittaasuata erseqqissaatigaa.
- Inuussutissarsiornermi ingerlatsisuusut ilisimasariaqarmassuk; ukiuni ukunani aningaasarsiorsinnaavugut. Assersuutigalugu aalisariummik pisiniarunik, taava aamma tamanna qularnaveeqqusersinnaasariaqarpaat.
AAMMA ATUARUK Aalisarneq pillugu inatsit allanngortinneqassaaq
Aalisartuulernissaq ajornaannerusariaqarpoq
Inuusuttut aalisarnermut peqataalernissaasa ajornannginnerulernissaannik oqariartuut IA Ataqatigiit siunnersuutaanni uteqqiappoq, siunnersuutinillu marlunnik tamanna inerneqarpoq. Aappaa inuttaqarnermut malittarisassanik qasukkaanissamik imaqarpoq.
- Maannakkut takusinnaavarput, inuusuttut umiarsuarnut aalisariutinut ikerusukkaluartut amerlasuutigut aporfissanik naapitaqartartut. Tamannalu pitsaasuunngilaq. Siunnersuutigaarput, inuusuttut nunatsinnut attuumassutillit, nunarput qimallugu najugaqarsimagaluarunilluunniit, inuussutissarsiummut aamma peqataalersinnaassasut.
Aatsitassanut inatsimmi aamma immikkut malittarisassaqarpoq, IA-lu isumaqarpoq aalisarnermi aamma taamaassinnaasoq.
Siunnersuutit aapparaat pisassaassutit nammineq pigisat niuerutigineqarsinnaasut aamma inuusuttunit aalisarnermi peqataalerusuttunit pissarisariuminarnerulernissaat. Tamanna ineriartortitsinissamut pisassiissutinik illikartitsinikkut pissaaq, pisassat nammineq pigisat niuerutigineqarsinnaasut tamarmik 10 procentii tassunga immikkoortinneqassallutik. Taakkualu Naalakkersuisunit aqunneqassapput.
- Inuusuttunut aamma peqataanerulersitsinissamut kinguaariillu nikikkiartorsinnaanissaannut atugassiatut, Sara Olsvig oqarpoq
Taama Inuit Ataqatigiit aamma kommunit aningaasaliisartullu peqatigiiffiisa aalisarnermi aningaasaliisinnaanissaat periarfissikkusuppaat, taamaalilluni piginnittuuneq maannakkornit siaruarnerullugu.
.
AAMMA ATUARUK IA aalisarneq pillugu oqallitsitsissasoq