IA aalisarnermut inatsisissakkut angusarissaarusupput pilersaarummili suli saqqummiussinngilaat

Inuit Ataqatigiit tusagassiuutinut sapaatip akunnerani kingullermi nalunaarutaanni taama allassimavoq.
 
Inatsilli tamanit ilorrisimaarutaasoq qanoq suliarineqassava? Aalisarnermi peqataasut tamarmik akuutinneqarnissaat pingaaruteqartoq, siulittaasoq Sara Olsvig isumaqarpoq. Aalisarnermulli inatsisissamik nutaamik saqqummiinissaminnut piareersimanatik erseqqissarlugu.

- Oqaloqateqarpugut, aamma oqaloqatigiinnerit ingerlalereerput. Taamaammat aaqqissutissanik Inuit Ataqatigiinniit ujartuivugut aamma qineqqusaarnerup nalaani suli annertunerusumik saqqummiussinissarput qilanaaraarput, Inuit Ataqaitigiit siulittaasuat, Sara Olsvig, KNR-imut taama oqarpoq.

Partiilli naalakkersuisuutitaqartup tamaattoq oqaatigisinnaavaa, nunatsinni pisassiissutit amerlanerusunut agguarneqarnissaat angorusukkitik.

Taamaassappallu kilisaataatillit siunissami pisassakinnerulissapput.

AAMMA ATUARUK Namminersorlutik Oqartussat 2 milliardit tungaannut annaasaqaratarsinnaasut

Naak annerpaanik kilisaataatillit Namminersorlutik Oqartussanit nunatta karsianut 2 milliardit tikillugit akeqarsinnaasumik taarsiiffineqarnissamik piumasaqarnissamik siorasaarigaluartut, Sara Olsvigip kilisaataatillit tamarmik akuerisinnaasaannik aaqqiissuteqarsinnaanissaq qularutiginngilaa.

 - Tamatumani peqataatitsineq qitiulluinnarpoq. Ingammik susassaqartut, tassalu kattuffiit ingerlatseqatigiiffiilu peqataatinneqataatinnerujussuullugit ingerlatsinermilu malissinaasaannik pilersitsisariaqarpugut, Sara Olsvig oqarpoq.
 
Aalisarnermut inatsimmik nutaassamut siunnersuumut Inuit Ataqatigiit naammaginninnginertik aatsaat takutilinngilaat.
 
Taamaalilluni aalisarnermut inatsit nutaaq pingaartumik partiinit Siumumit Partii Naleqqamillu taperserneqarpoq.

AAMMA ATUARUK Aalisarneq pillugu inatsit allanngortinneqassaaq

Partiilli taakkua aalisarnermut inatsisissatut siunnersuut taamaatsillugu aalajangiusimassappassuk, Inuit Ataqatigiit suleqataanissaannut qanoq kinguneqassanersoq, Sara Olsvigip suli oqaaseqarfigerusunngilaa.

- Tusagassiutit aqqutigalugit uanga isumaqatiginninnianngilanga. Kisianni nunatsinnut aaqqissutisamik pitsaanerpaamik nassaarnissamut qilanaarpunga. Nunarput aalisarnermi nunarsuarmi siuttunngorsinnaavoq. Tamanna angunissaanut kikkut tamaasa suleqatiginissaannut uagut ammavugut.

AAMMA ATUARUK Sanngiinnerit aalisarnermut inatsisissamit eqqugaasinnaasut