Pisassiissutit Krusep paasisinnaannginnerarai
Naalakkersuisup Karl-Kristian Krusep iliuuserisimasani paasiuminaatsippai. Taamatut oqarneq tupaallannartuuvoq, namminerli Atuagagdliutini taama allaatigisaqarpoq.
Sooruna nannut 35-it Ittoqqortoormiini pisarineqarsinnaasut arfiniliinnaallu Qaanaami. Aalisarnermut naalakkersuisup Atuagagdliutini allaatigisamini tamanna paasisinnaannginnerarpaa.
Karl-Kristian Kruse nassiuaavoq Qaanaamiinnermi arlaleriarluni aperineqarsimalluni sooq nannut arfiniliinnaat Qaanaami pisarineqarsinnaanersut.
- Nassuerutigisariaqarpara apeqqut akissutissaaleqissuttarakku, nassuiaassutigiuminaatsillugulu sooq amerlanernik pisaqqusaanngitsut, naak nannutassat pillugit ukiut tamaasa akisussaasuugaluarlunga, Karl-Kristian Kruse allappoq.
Pissutaasorli paasiuminaatsuunngilaq. Pisasiissutimmi aalajangersarneqarnerinut pisassiinermi suut Naalakkersuisunit toqqammavigineqassanersut Inatsisartut inatsisaanni §3-mi allassimavoq.
- Pisassiissutit aalajangersarneqassapput nunat tamalaat isumaqatigiissutaat, uumassusilinnik misissuisut siunnersuinerat, atuisut ilisimasaat kiisalu Piniarneq Pillugu Siunnersuisoqatigiinnik tusarniaasimaneq eqqaamaniarlugit, inatsit taama oqaasertaqarpoq.
Nanoqassuseq apeqqutaatinneqartoq
Sofie Erbs-Maibing nannunut tunngatillugu naalakkersuisoqarfimmi sullissisuuvoq, pisassiissutillu qanoq agguataarneqartarnerinut nassuiaatissaq taassuma ajornanngitsuaraanerarpaa.
- Nanoqassuseq toqqammavigalugu pisassiisoqartarpoq. Piniartut amerlassussaat apeqqutaatinneqarani nannut amerlassusaat apeqqutaatinneqartarpoq, Sofie Erbs-Maibing oqarpoq.
Karl-Kristian Kruselli erseqqissarpaa pisassiissutit sumiiffimmit sumiiffimmut assigiinngitsuusinnaarnerat paasiminaatsillugu.
Aamma atuaruk Krusep attuumassuteqartuunini ilisimasimanngilaa
Aamma atuaruk Nannut Ittoqqortoormiit illoqarfiannut pisartut amerlapput
- Paasiuminaatseqaara Qaanaamut nannut taamaallaat ukiumut arfinillit pisasiissutaasarmata, akerlianillu Illoqqortoormiuunnarnut ukiumut 35-it pisasiissutaasartut, Kruse allaatigisamini taama allappoq.
Naalakkersuisup kingorna erseqqissarpaa, ingerlatsiviit susassaqartut suleqatigalugit pisassiissutit amerlineqartariaqartut. Piniartummi nanoq ataaseq sisamaattariaqaraat akuerineqarsinnaanngitsoq tunngavigilersuutigaa.
Siunnersuineq nutaaq piariingajalersoq
Karl-Kristian Kruseli susassaqarfimmut tassungarpiaq naalakkersuisuuvoq aqutsinermullu akisussaasuulluni. Siunnersuinermilu, Krusep kissaatigisaatut, piniartutut amerlassusaat apeqqutaatinneqartussanngillat nanoqassuserli apeqqutaatinneqartussaalluni.
Qaanaami nanoqassuseq pillugu ukioq manna nutaamik siunnersuisoqartussaavoq, tamatumanilu pisassiissutaasut allanngornerinik kinguneqaratarsinnaassalluni.
