Klaus Nygaard ukiuni 30-ni pisortaareerluni: Pinngortitaleriffiup piunerata siunertaanik paasinninnerusoqalerpoq

Klaus Nygaard Pinngortitaleriffimmi pisortatut ukiuni 30-ni atorfimmini 2023-mi septembarip aallaqqaataani suliunnaarpoq, taartigalugulu Josephine Nymand. Tassa nunarput pillugu ilisimatusarnermi siuttuujunnaarpoq.

Klaus Nygaardimi Pinngortitaleriffik eqqartortillugu taanngitsuugassaasanngilaq.

Taanna Pinngortitaleriffeqanngikkallarmalli Kalaallit Nunaanni Aalisakkanik Misissuivimmi 1987-imi kiserrammi sulilerpoq:

- Kiserramma sulilerpunga. Københavnimi 30-nik Nuummilu ataatsimik suleqateqarpunga. Ikiortitut atorfimmik Nuummi aamma peqaraluarpoq, taannali inuttalerneqarsimanngimmat kiserramma qaammatini arfineq-pingasuni sulivunga. Taamaammat msissuivimmi aqutsisutut sulinera oqeqaaq, taanna oqarpoq.

Pilersinneqarsinnaassangatinneqarsimanngitsoq

Klaus Nygaardip Københavnimiit Nuummut nuunnissi nalornisigisimavaa. Nunatsinnimi iluatsitsilluarsinnaanissi takorlooruminaatsissimavaa. Taannalu kisimi taama isumaqarsimanngilaq:

- Kalaallit Nunaanni pinngortitaleriffeqalerumaarnissaa Danmarkimi ilisimatusartut silarsuaanni taamanikkut ilimagineqanngilaq. Taama isumaqarnerisa pilersinnissaanut soorunami tamaviaarnerulersiinnarpaatigut. Tamanna pissaqqaartoq sapinngikkippullu takutissallugu aalajangerpugut, taanna oqarpoq nangillunilu:

- Sulisussarsiorniarnerup, sulisooreersut sulisoriinnarniarnissaasa sulisunillu ineriartortitsiniarnerup tungaatigut ajornakusuussangatippaat. Taamatulli oqarnerat tunngavissaqanngilluinnartoq takutipparput, taanna oqarpoq.

Ineriartupiloortoq

Pinngortitaleriffimmi, 100 kvadratmeteriusimasoq maannali 6000 kvadratmeteriusoq, Klaus Nygaardip ukiuni 30-ni pisortaanerani sutigut tamatigut ineriartupiloorpoq, aamma sulisoqarnikkut:

- Maanna sulisut aamma piukkunnarluarneroqaat. Maanna ilisimatusartuunerpassuartaqarpugut. Piukkunnarluartunik sulisoqarmat aningaasaliisoqarluarpoq, aningaasaliisoqarluarmallu piukkunnarluartunik sulisoqarpoq. Taakkualu ineriartupiloorneranut peqqutaaqataapput, taanna oqarpoq nangillunilu:

- Taamaalilluni isumaminik ineriartorpoq. Uanga pisortaanera ineriartorneranut tunngaviunngilaq. Sorpassuartigut isumaminik ineriartorpoq, taanna oqarpoq.

Nunatsinnut noorartut Ilisimatusarfimmilu sulisut amerliartortut, Klaus Nygaard oqarpoq. 80-ikkut naaneranni sulilerami Pinngortitaleriffimmi ilisimatusartut qallunaaginnaapput, maannali pissutsit allarluinnaallutik:

- Kalaallit Nunaanni ilisimatusartuni kalaallit nunanillu allaneersut amerliartuinnarput. Ingammik silap pissusiata allanngoriartornerata 00-kkunni oqallisaangaatsialernerata kingornali. Pinngortitaleriffimmi ilisimatusarnissamik qinnuteqarlutik saaffiginnittartut imaaginnavipput, amerlanerpaartaalli itigartittariaqartarpavut.

Assuarlertut ikiliartortut

Nunarsuarmioqatitta Issuttumik isiginneriaasiat silap pissusiata allanngoriartornerata ilutigisaanik aamma allanngorpoq. Tamannalu Pinngortitaleriffimmi arajutsisimanngilaat. Ilisimatusarsiorniarnermi ilisimatusarnermullu aningaasaliisussarsiorniarneq pisariinnerulerpoq.

Nunarsuarmioqativulli Pinngortitaleriffimik isiginneriaasiat amma allanngortoq, Klaus Nygaard isumaqarpoq. Siornatigummi isigiperlunneqaannarnani aamma assuarineqartarsimaqaaq. Ingammik nunatta aalisartuinit, piniartuinit aamma politikeriinit  – tamannali allanngorpoq:

 - Pinngortitaleriffik aaqqiagiinngissutaanikooqaaq. Aamma akerliussutsimik takutitsisoqartarnikuuvoq, taavalu inuit internettikkut attaveqatigiittarfiisigut torinngitsumik oqallisaasarnikooqaaq. Pinngortitaleriffiulli piunerata siunertaanik aamma paasinninnerusoqaleriartorpoq, taanna oqarpoq nangillunilu:

- Pinngortitarmi sullinnagu inuiaqatigiit sullippavut. Pinngortitamik piujuartitsineq aallaavigilluinnarlugu atorluaanissaq ilisimatusarnitsinni qularnaagassaraarput.

Nunatsinni pinngortitamit tiguartittoq

Ingammik nunatsinni pinngortitaq, Klaus Nygaardip nunatsinnut 80-ikkunni nuunnermini tiguartiffigaa. Aamma nunatsinniiginnarniarneranut peqqutaaqataavoq. Taannami Pinngortitaleriffimmi pisortaajunnaarluni maanna siunnersortitut atorfeqarpoq, piumagaluarunilu Københavnimut uterluni soraarninngoriaannaagaluarpoq.  

Aamma sooq nunatsinniiginnarniarnersoq aperigatsinni ima akivoq:

- Nipaannera peqqutaavoq. Illoqarfeqatitsinni ilisarisimannitserpassuaqarpunga. Tamaanilu juullisiorneq aamma peqqutaaqataalluinnartunut ilaavoq. Danmarkimut oktobariinnarsuarmi juullerpalaalereertartumut uternissara orniginnartinngeqaara, taanna oqarpoq nangillunilu:

- Kalaallit Nunaanni pinngortitaq uterisunnginninnut peqqutaanerpaavoq. Mikrofinimi qamitsiaannarit aavariassaanga.