Pinngortitaleriffik: Aalisarfiit tamaasa misissuiffigisarpagut
KNAPK-p SQAPK-llu Aalisarnermut inatsisissaq aappaagu ukiakkut saqqummiunneqarnissaminut piareersarneqaleruttortoq 2024-mut kinguarteqquaat.
Tamatumunnga uumassusilerituut sinerissamut qanittumi qaleraleqassutsimik misissuisarnerat ilaannakorpallaarneralugu isornartorsiutertik tunngavilersuutigaat.
Uumassusilerituut aalisarfinni kangerluunngitsuni qassutinik pisat kisiisa tunisassiorfinni misissortaraat taakkua pasillerput, oqarlutillu kangerlunni ningittakkanik pisanik misissuisariaqartut.
- Tassami taannaana pingaaruteqartikkipput, peqassuseq eqqortumik naliler0neqanngimmat, KNAPK-p siulittaasua, Nikkulaat Jerimiassen KNR-mut siusinnerusukkut oqarpoq.
Pinngortitaleriffik: Suut tunngaviuppat?
Taamali pasilliineq Pinngortitaleriffimmeersut akerlilerpaat.
Pinngortitaleriffimmi aalisakkanut qalerualinnullu immikkoortortaqarfimmi pisortap aalisartut kattuffiisa isornartorsiutaat sumik tunngaveqarnersut paasinngilaa.
- SQAPK-p KNAPK-llu uumasorsiuut qaleraleqassutsimik naliliisarnerat ilumuunnginnerarpaat. Taamaanneraanermut suna tunuliaqutaanersoq Pinngortitaleriffimmit ilisimanngilarput, Helle Siegstad KNR-mut allappoq.
Ilisimatusartummi misissuinerminni qalerallit ningittakkanik qassutinillu kangerlunni kangerluunngitsunilu pisat tamaasa misissortaraat, taanna allappoq.
- Ilisimatuussutsikkut siunnersuinigut aalisarnermit paasissutissanik sivisuumi katersukkanik ilisimatuutullu misissuinermik tunngaveqartut aamma paasissutissat naatsorsuinerillu pitsaassusaat aalisakkat pillugit Atlantikup avannaani ilisimatusartunit allanit qulakkeerneqartartut ilisimatitsissutigisinnaavarput, Helle Siegstad allappoq.
AAMMA ATUARUK Naalakkersuisoq aalisartunut: Qanoq pisasseeriaaseqassuunga?
Erseqissaavorlu:
- Paasissutissat, maanna pigisagut tunngavigalugit maanna taama aalisartigineq pitsaasuunngitsoq oqaassalluni naammappoq.
Aalisarnermut inatsisissaq aalisartut kissaataattut kinguarteqqinneqassanersoq, aalisarnermut naalakkersuisup, Aqqaluaq B. Egedep naalakkersuisoqatigini peqatigalugit maanna isumaliuutigaa.