Naalakkersuisoq aalisartunut: Qanoq pisasseeriaaseqassuunga?
![](/sites/default/files/styles/image_934x467/public/article_images/aqqaluaqbegede.jpg?itok=uxTWF2Lc)
Aalisarnermut naalakkersuisoq, Aqqaluaq B. Egede taassumalu naalakkersuisoqarfia aalisarneq pillugu Ilulissani ullumi isumasioqatigiisitsivoq.
Inuit 70-it missaanniittut akunnittarfimmi Hotel Arcticimi peqataapput. Taakkua tassaapput sinerissamut qanittumi aalisartut piniartullu kattuffii, kattuffiit immikkoortortaqarfii Sisimiunit avannamut aallartitaqartut, Inatsisartut ataatsimiititaliaannut ilaasortat, atorfilittallu.
AAMMA ATUARUK Aqqaluaq misileeqqippoq: Aalisarneq pillugu marsimi isumasioqatigiissitsinissamut qaaqqusivoq
Aalisarnermut naalakkersuiusup, Aqqaluaq B. Egedep, isumasioqatigiinneq ammarlugu oqaaseqarnermini oqaatigaa, isumasioqatigiinnermi aalisartut Aalisarneq pillugu Ataatsiimiititaliarsuup isumaliutissiissutaa pillugu isummatik annisissagaat kissaatigalugu.
KNAPK pisassat pillugit ataatsimik isumaqanngitsoq
Aalisartut tamarmik immikkut namminneq pisassanik pigisaqalernissaat aalisartut oqallisigisaannut ilaavoq. Aalisarneq pillugu Ataatsimiititaliarsuaq isumaliutissiissummini allappoq, aalisartut namminneq pisassaqalernissaat siunissamut isumannaarinninnerusoq taamaaliornikkullu piujuaannartitsinermik aalisartoqassasoq.
![Fiskeriseminar Ilulissat](/sites/default/files/styles/image_934x467/public/article_images/img_20220302_150231.jpg?itok=-8MCvJZR)
KNAPK-p ataatsimiititaliarsuup isumaliutissiissutaani umiatsiaararsortut tamarmik namminneq niuerutigisinnaasaminnik pisassaqalernissaat angorusuppaa. Taassumali Uummnnami immikkoortortaqarfiani ilaasortat amerlanerussutillit, namminneq niuerutigisinnaasaminnik pisassaqalernissartik piumanngikkaat, KNAPK-p Uummannami immikkoortortaqarfianiit ullumi oqarput.
Naalakkersuisoq: Qanoq pisasseeriaaseqassaanga?
Pisasseeriaaserlu qanoq ittuussaanersoq pillugu naalakkersuiusup aalisartut aperai.
- Pisariaqartitarput Naalakkersuinikkut unaavoq, pisassat niuerutigineqarsinnaassappata niuerutigineqarsinnaassanngippataluunniit inummut pigisassanngortitsiniarnermi apeqqut uani oqallisissiarineqartoq qanoq isumaqarfigivisiuk, takoreerparsi ullumikkut unammillernartumik inisseriataartarpusi immaqa pisariaqarnerpaaffiani. Qanoq aaqqiissuugut?, Aqqaluaq B. Egede oqarpoq.
AAMMA ATUARUK Aqqaluaq: Ataatsimiititaliarsuup suliaa inatsisiliornissamut naammanngilaq
Sinerissap Qanittuani Raajarniat Kattuffiat, qaammat kingulleq raajarniaannarnik ilaasortaqarluni kattuffinngortoq isumasioqatigiittoqarmat aamma peqataavoq. Kattuffinngorlaaq aalisakkanik allanik aalisartunit ilaasortaaffigineqalertoq, siulittaasuat Henrik Sandgreen oqarpoq.
Isumasioqatigiinneq aalisarneq pillugu nutaamik inatsisiliornissamik sulinermut ilaavoq. Isumasioqatigiinneq Ilulissani aqagu nangissaaq. Nuummilu aamma sapaatit akunnerisa tulliani ulluni marlunni isumasioqatigiittoqassaaq.
Aalisarnermut inatsisissatut siunnersuut Naalakkersuisut sulisisisuminnut, tassa Inatsisartunut aappaagu upernaakkut saqqummiutissallugu naatsorsuutigaat.