Aqqaluaq misileeqqippoq: Aalisarneq pillugu marsimi isumasioqatigiissitsinissamut qaaqqusivoq
Ataatsimiititaliarsuup isumaliutissiissutai naapertorlugit Naalakkersuisut nutaamik aalisarneq pillugu inatsisiliorusupput.
Taanna upernaakkut Inatsisartut ataatsimiinneranni 2023-mi naammassereersimassasoq naatsorsuutigineqarpoq, tamannalu pitinnagu Aalisarnermut naalakkersuisoq Aqqaluaq B. Egede (IA) nunatsinni aalisartunik oqaloqateqarniarluni angalaniarpoq.
Aalisanermut inatsimmut aallarniut
Aalisarnermut ataatsimiititaliarsuup isumaliutissiissutini utaqqisaajuarsimasoq septembarimi saqqummiuppaa. Isumaliutissiissut aalisarnermut inatsimmut nutaamut innersuussutinik arlalinnik ilaqarpoq.
Aalisarnermut inatsit maanna atuuttoq 1996-imeersuuvoq, taannalu tamatuma kingorna amerlasooriarlugu allanngorterneqartarsimalluni.
Naalakkersuisut aalisarnermut inatsimmut nutaamut siunnersuummik siorna ukiakkut ataatsimiinnermi saqqummiussiniaraluarput. Taamaattoqanngilarli, siunnersuutip maanna upernaakkut 2023-mi piareersimanissaa pilersaarutaavoq.
Aalisarnermut inatsit nutaap oqallisigineqarnerani nunatta avannaani qaleralinniarneq pingaarnerit ilagaat. Aalisarnermut ataatsimiititaliarsuup aalisakkanut ikittunut aalisartoqartoqarpallaartoq inerniliissutigaa.
Paasissutissarsiffik: KNR
Tamanna qangali aallartereertussaagaluarpoq, covid-19-li januaarimi tuniluunnera pissutigalugu kinguartinneqarsimalluni.
Maannali nutaamik ulluliisoqarpoq, isumasioqatigiinnerlu siulleq Ilulissani marsip aappaanni pingajuannilu pissaaq, tamatumalu kingorna Nuummi marsip qulingiluaanni qulingannilu isumasioqatigiittoqassalluni.
- Aalisarneq pillugu isumasioqatigiinnerit, nunatsinni siunissami aalisarneq pillugu oqallittoqarnissaanik periarfissiissapput, aalisarneq pillugu inatsisissamut nutaamut suliaqarnermi ilaliunneqartussanik, taama aalisarnermut naalakkersuisoq tusagassiutinut nalunaarummi allappoq.
Isumasioqatigiissitsinissamut qaaqquneqartut ilaatigut tassaapput: KNAPK, SQAPK aammalu Sulisitsisut.
AAMMA ATUARUK Fiskerne i Ilulissat føler sig overset til seminar
Aalisarneq pillugu inatsisip oqallisigineqarnerani akuutitsineq aamma isornartorsiorneqarpoq. KNAPK-p Ilulissani immikkoortortaqarfianit aalisartoq ataasiinnaq isumasioqatigiinnermut kisimi peqataasinnaavoq.
Tamanna naammaginanngitsoq, Aabili lange decembarimi oqarpoq. Taanna Ilulissani immikkortortami siulittaasuuvoq.
Isumasioqatigiinneq internettikkut toqqaannartumik aallakaatinneqarumaartoq Naalakkersuisut tusagassiuutinut nalunaarummi allappaat.