Aalisartut ataatsimiititaliarsuup suliaa pillugu isumasioqatigiilersut

Ilulissani Aalisartut Piniartullu Peqatigiiffiannit aallartitatut inuk ataaseq, Naalakkersuisunit qaaqqunneqarpoq. Tamannali peqatigiiffiup naammanngisimaanngilaa.
Aabili Lange, IAPP
- Umiatsiaararsortunit angallatersortuniillu aallartitaqarpugut. Taakkua isumaat tamarmik tusaaneqartariaqaramik, Aabili Lange oqarpoq. Assi © : KNR/ Andreas Wille
Allattoq Andreas Wille
decembarip 16-at 2021 10:25

Aalisarnermut Naalakkersuisup, Aqqaluaq B. Egedep, aalisartut Ilulissanut aappaagu januaarip 19-anni ataatsimiigiaqquai.

Piumasulli tamarmik takkussinnaanngillat. Naalakkersuisup Ilulissani KNAPK-p immikkoortortaqarfianit inuk ataaseq aallartitatut qaaqquaa. Tamannali qaaqquneqartut amigaraat. Taakkua ikinnerpaamik pingasoorusupput.

- Ilulissani Aalisartut Piniartullu Peqatigiiffianinngaanniit isumaqarpugut, siulersuisuni umiatsiaararsortunit aallartitamik, angallatersortunit ilaasoqassasoq aammalu ilaasortatsinnit ataatsimik minnerpaamik ilaasoqassasoq, peqatigiiffiup siulittaasua, Aabili Lange KNR-mut oqarpoq nangipporlu:

- Umiatsiaararsortunit angallatersortuniillu aallartitaqarpugut. Taakkua isumaat tamarmik tusaaneqartariaqaramik.

Qaleralittassiissutit ikinnerusut

Peqatigiiffik amerlanerorusunnertik pillugu Naalakkersuisumut akisussaasumut allagaqarniarlutik oqarput.

Ataatsimiititaliasuup suliani, aalisarnermut inatsisissaq pillugu isumaliutissiissummik imalik, ukiaq saqqummiummagu oqallittoqaqaaq.

Taakkuami siunnersuutigaat, Qeqertarsuup Tunuani, Uummannami Upernavimmilu qaleralittassat uumasorsiuut innersuussutaat malillugit ukiuni tullerni oqimaassusilerneqartassasut.

Taamaalisoqassappat ullumi pisaasartut affaat sinnerlugit aalisarneqarsinnaajunnaassapput. Tamannalu isumasioqatigiinnermi eqqartugassanut ilaassaaq.

Akunnerit marluk

Aalisartulli aamma allamik iluaangisaqarput. Isumasioqatigiinnermi ullormik ataatsimik sivisussusilikkami isumaliutissiissut 375-inik quppernilik sammineqassaaq.

Ullormut pilersaarut malillugu Aalisarneq pillugu Ataatsimiititaliarsuup isumaliutissiissutaani sinerissap qanittuani qaleralinniarneq, oqallisaasaqisoq, akunnerit marluk iluanni saqqummiunneqarlunilu oqallisigineqassaaq.

- Qaleralinniaqarfimmi taama annertutigisumi, maanngaanniit avannamut isumaqaraluarpugut ulloq ataaseq qaleralinnut atorneqassasoq, Aabili Lange oqarpoq.

KNR-mit aalisarnermut naalakkersuisup, kikkut allat qanorlu amerlatigisut qaaqqusimanerai aperaarput. Taassuma naalakkersuisoqarfia, isumasioqatigiinneq pillugu piffissami qaninnermi nalunaaruteqassallutik akivoq.

Taakkua aamma sumiiffimmi allami isumasioqatigiisitsiniarnersut aperigaluarpagut apeqqulli akinngilaat.

Aamma atuaruk