Aqqaluaq: Ataatsimiititaliarsuup suliaa inatsisiliornissamut naammanngilaq

Naalakkersuisup Aalisarneq pillugu Ataatsimiititaliarsuup isumaliutissiissutaa naammassereersoq aalisarnermut inatsisiliornissamut naammaginngilaa. Taamaattumik isumasioqatigiisitsilerpoq. Demokraatit aalajangiisinnaassuseqannginnertut isigaat.
- Aalisartut sinerissami ima amerlatigipput kattuffiup nipaanik allaanerusumik immikkoortortaqarfiit naliliisinnaanerat piusarluni, Aqqaluaq B. Egede oqarpoq. Assi © : KNR
Allattoq Andreas Wille
marsip 01-at 2022 09:14

Aalisarneq pillugu Ataatsimiititaliarsuup sulianik, tassa isumaliutissiissusiani, ukiaq naammassivaa. Ataatsimiititaliarsuup ilaasortai millionit arfinillit atorlugit ukiuni marlunni sulipput. Suliaalli aalisarnermut nutaamik inatsisiliornissamut naammagineqanngilaq.

- Inatsimmik suliaqarnissamut naammattutut nalilinngilara, aalisarnermut naalakkersuisoq, Aqqaluaq B. Egede KNR-mut oqarpoq.

AAMMA ATUARUK Aqqaluaq misileeqqippoq: Aalisarneq pillugu marsimi isumasioqatigiissitsinissamut qaaqqusivoq

Taassuma isumaliutissiisut naammaginnginnamiuk, sinerissamut qanittumi aalisartut peqatigiiffii Ilulissani Nuummilu isumasioqatigilerpai.

Taamak aaqqissuineq isummernaveersaarnerusoq, Demokraatit siulittaasuat isumaqarpoq.

Taannami naapertorlugu, Naalakkersuisup aalisartut kattuffiisa isumaat naqitanngorlugu isumaliutissiissutitut pigereerpaa.

- Soorunami imminermini ajortuunngilaq aalisartunik allanillu oqaloqateqarluni tusarniaaneq. Kisianni uani eqqartugassaq taakku atuisut taakkorpiaat peqataanikuupput, Jens-Frederik Nielsen oqarpoq.

Ataatsimiititaliarsuarmi ilaatigut KNAPK, SQAPK, SIK Sulisitsisullu ilaasortaatitaqarput.

Naalakkersuisoq: Kattuffiit peqatigiiffiillu isumaat allaasarput

Isumaliutissiissut 375-nik qupperneqarpoq, nunatsinnilu inuussutissarsiummut pingaarutilimmut inatsisiliornissamut atugassaavoq. Tassanili aalisartut kattuffiisa ilanngussaat tunuliaqutaasa isumaannut naapertutinngitsutut naalakkersuisup nalilerpaa.

- Aalisartut sinerissami ima amerlatigipput kattuffiup nipaanik allaanerusumik immikkoortortaqarfiit naliliisinnaanerat piusarluni, Aqqaluaq B. Egede oqarpoq.

Demokraatit: Naalakkersuisut nalorsarput

Isumaliutissiissulli ukiaq piareereermat, politikkikkut aalajangiinissat, tassa Naalakkersuisut inatsisissamik siunnersuusiornissaat, Inatsisartunullu oqallisigisasanngortinnissaa kisinngoruttoq illuatungiliuuttut isumaqarput.

- Nalulluinnarpaat qanoq ilusilimmik aalisarnermi aaqqissuusiniarnersut. Taamaammat aalajangiisinnaannginnerup pianik maannakkut naapititsisaqattaarnerit ingerlateqqilerpaat, naak qangali suliaq naammassereeraluartoq, Jens-Frederik Nielsen oqarpoq.

AAMMA ATUARUK Aalisartut ataatsimiititaliarsuup suliaa pillugu isumasioqatigiilersut

Naalakkersuisut aalisarneq pillugu inatsimmik siunnersuutissartik, Inatsisartunut aappaagu upernaakkut saqqummiutilersaarpaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk