Pinngortitaleriffik pisortartaassasoq
Pinngortitaleriffik pisortartaartussanngorpoq.
Pinngortitaleriffiup maannamut pisortaata Klaus Nygaardip tunuarniuteqarluni nalunaaruteqarnerata kingorna naalakkersuisut Josephine Nymand pisortassatut toqqarpaat
Josephine Nymand Pinngortitaleriffimmi Avatangiisinut Immikkoortortaqarfimmi pisortatut maanna atorfeqarpoq, tassani 2014-imili atorfeqarsimalluni. Ilisimatusarnermut Siunnersuisoqatigiinni taassuma saniatigut siulittaasuuvoq.
Josephine Nymand biologitut ilinniarsimasuuvoq, Københavns Univsersitetianilu ph.d.-qarluni.
Nunalerinermut, Imminut pilersornermut, Nukissiutinut Avatangiisinullu naalakkersuisoq Kalistat Lund Josephine Nymandip Pinngortitaleriffimmi pisortanngorneranut atatillugu tusagassiorfinnut nalunaarummi oqaaseqaateqarpoq:
- Josephine Nymand atorfinitsissinnaagatsigu nuannaarutigaara. Ilisimatusarnerup silarsuaani Kalaallit Nunaannilu ilisimaneqarluarpoq pikkorissuullunilu. Nukittuumik kiinnertarpoq, ukiorpassuarnilu aqutsisutut misilittagaqarluni, periusissiorfiusumik eqqarsartarluni aammalu angusassanik angusaqarnissamut pikkorissuulluni, naalakkersuisoq Kalistat Lund oqarpoq.
