Aalisarnermut ataatsimiititaliameersut: Pinngortitaleriffik pitsaanerusumik siunnersuisariaqartoq

- Innersuussineq taamatut isikkoqartillugu inuiaqatigiit massakkut killiffigisaanut aalisagaqassutsimut uniuisutut annertuumik massakkut qisuariarfigivarput, Siumumeersoq Karl Kristian Kruse, Demokraatineersumit ilalerneqartoq oqarpoq.

AAMMA ATUARUK Sinerissap qanittuani qaleraleqassuseq kinguariarpoq

- Tassa taanna isumaqataaffigilluinnarpara, pissutigalugu ulluinnarni atuisut ullumikkut aperigukkit allatut oqariartormata, Demokraatineersoq Steen Lynge oqarpoq.

Aalisartut namminneq nalunaarusiaat aallaavigineqartoq

Tunitsivinnimi killilersuivallaartut, taakku isumaqarput:

- Massakkut oqariartuutigineqartut pinngortitaleriffimminngaannik illuatungilerneqarsinnaapput. Ulluinnarni atuisut aalisartut taavalu tunisassiorfiit aperigukkit ukiup kingullermut sanilliullugu ullumikkut aalisarnerat pitsaaneruvoq, Steen Lynge oqarpoq.

Ilisimatuut naapertorlugit qalerallit avataanit sinerissap qanittuanut pisartut, Karl Kristian Kruse oqarpoq. 

AAMMA ATUARUK Avataani qaleraleqarluarnera sinerissap qanittuanut pitsaasumik sunniuteqarsinnaasoq

Avataanili maanna qaleraleqarluarmat avataani qaleralittarineqarsinnaasunut innersuussutit qaffanneqartut, sinerissap qanittuaniittut apparneqarput. 

- Taakku illuatungeriisikkaanni oqimaaqatigiinngillat imminnullu ataqatigiinnatik, Karl Kristian Kruse oqarpoq.

Aningaasaliissutit amerlineqartariaqartut

Pinngortitaleriffik aalisarneq pillugu pitsaanerusumik siunnersuisariaqartoq, aalisarnermut ataatsimiititaliameersut isumaqarput.

Namminersorlutik Oqartussat pinngortitaleriffimmut amerlanerusunik aningaasaliissuteqarpata tamanna anguneqassasoq, Karl Kristian Kruse isumaqarpoq:

- Inuiaqatigiit ilisimasaat annertunerusumik qanillattussappata taava piumasaqarnerit aammalu aningaasaliisarnerit suli annertunerunissaanik avaqqutsisoqarsinnaanngitsoq ersippoq. 

Illuatungiliuttup Demokraatineersup Siumumeersoq isumaqatigaa.

AAMMA ATUARUK Qaleralinniartoqarpallaarpoq

- Aningaasaliineq pinngortitaleriffimmut annertunerusoq pisariaqarparput, pissutigalugu tutsuiginarnerusumik misissuisarnerit pisarniassammata, Steen Lynge oqarpoq.

Aalisartut namminneq nalunaarusiaat 2014-imeersut aallaavigalugit pinngortitaleriffiup Qeqertarsuup Tunuani, Uummannami Upernavimmilu sinerissap qanittuani pisassiissutit pillugit innersuussutit apparpai.

Nalunaarusianimi allassimavoq sumiiffinni taakkunani qaleraleqassuseq kinguariartoq, pinngortitaleriffik allappoq.