Piniartut silap pissusiata allanngoriartorneranik eqqugaasut ikiorserneqartalernissaat siunnersuutaasoq
![](/sites/default/files/styles/image_934x467/public/article_images/img_6806.jpg?itok=OfUU1NXA)
Inuussutissarsiutigalugu aalisartut piniartullu silap pissusiata allanngoriartorneranik ukiuni kingullerni eqqugaangaatsiarput.
Taamaammat piniartut, aalisartut savaatillillu silap pissusiata allanngoriartorneranik eqqugaasut aningaasatigut ikiorserneqartalernissaat, Inuit Ataqatigiinneersup Agathe Fontainip Inatsisartuni aalajangiiffigisassatut siunnersuutigaa.
Taassuma siunnersuutaa Inatsisartut ullumi marlunngornermi oqallisigissavaat.
Inatsit atuuttoq pisariuallaartoq
Aningaasanut inatsit aalisartunut piniartunulluunniit silap pissusiata allanngoriartorneranik eqqugaasunut aningaasatigut ikiorsiinissamut taamaallaat atugassamik immikkut kontoqalertariaqartoq, Agathe Fontain siunnersuummini ilaatigut allappoq.
Kattuffiit attuumassutillit aningaasatigut ikiorsiisarnermik aaqqissuussinermi suleqatiserineqassasut, Agathe Fontain isumaqarpoq.
Tamanna pillugu inatsit atuuttoq pisariuallaarmat taamaaliornissamik siunnersuuteqarnini tulluartuusoq, taanna isumaqarpoq.
Inuussutissarsiutigalugu piniartut aalisartulluunniit ilungersuasut aningaasatigut ikiorserneqarnissamik kommunerisaminnut qinnuteqarsinnaapput.
Tamaaliortinnatilli inuussutissarsiutigalugu aalisartutut piniartutulluunniit nalunaarsorsimajunnaarlutik suliffissarsiortutut, utaqqiisaannaagaluartumilluunniit, allatsissimanissaasa inatsimmi piumasaqaataanera akimmisitsisuuvoq.
Qaanaami piniartut ukiorluunera pissutigalugu piniariaannaanngitsut siorna decembarimi oqaluttuarigatsigu tamanna erserpoq.
Taamaammat aalisartut piniartullu pisortanit ikiorsiissutissarsisinnaaniassammata kommunerisaminnut Naalakkersuisunit saaffiginneqquneqarput.
Naalakkersuisullu taamaalioqqusinerat Qaanaamiut Inatsisartullu inuussutissarsiummik asoorusseqqusinertut taallugu isornartorsiorpaat.
Nunat siuttuusut akisussaaqataasut
Nunat siuttuusut silap pissusiata allanngoriartorneranut akisussaaqataammata qanoq iliuuseqarnissamik aamma pisussaaffeqarnerat tunngavilersuutigalugu Naalakkersuisut siulittaasuat ministeriunermik tamatuminnga oqaloqatiserinneqqusimagini, Agathe Fontain siunnersuummini aamma allappoq.
Siunnersuut taanna aappassaaneerneqassanersoq Inatsisartut aqagu marlunngornermi siullermeerunikku aalajangissavaat.