Qarsoq Høegh-Dam Naleqqami suliffittaartoq

Qinersinermi taaguunneqangaatsiarsimasoq Siumumit maajimi tunuarpoq, maanna Naleqqami atorfinippoq.

Allattoq Nûno Pedersen

juulip 17-at 2024 14:36

Nutserisoq Connie Fontain

Qarsoq Høegh-Dam suliffittaarpoq: Siumumi taaguunneqarluarsimasoq Naleqqami siunnersortinngorpoq.

Naleqqamuli ilaasortanngornani, taanna KNR-imut oqarpoq. Ilaasortanngorniarnerlunili oqaatigiumanngilaa – taamaallaalli:

- Politikkikkut suliaqartuaannassaanga.

Atorfik Qarsoq Høegh-Damimut nutaajunngilaq. Taassumami Naleqqap allaffiani kaffimik sumut aallissanerluni nalunngilaa, tassanimi partiimi Partii Naleqqamik taaguuteqarallarmat siunnersortaareerpoq.

Taanna 2018-imi 2019-imilu politikkikkut siunnersortaavoq, naalakkersuisumut allattaavoq partiimilu allattaallunilu. Maannalu uteqqippoq.

- Tassa neqeroorfigitinnikuullunga, kaffisoqatigereernerani atorfinikkama, Qarsoq Høegh-Dam KNR-imut oqarpoq.

Taanna Inatsisartunut 2021-mi qinersisoqarmat 796-init taaguunneqarpoq.

Taamaallaalli Aslak Vilhem-Jensenimit, Erik Jensenimit aamm Kim Kielsenimit taaguunnikinnerulaaginnarluni.

Qarsoq Høegh-Damili Inatsisartuni ataatsimeerngaartoqanngitsoq suli, eqqartuusaassimanini peqqutigalugu nammineerluni Inatsisartunit tunuarpoq.

PAASISSUTISSAT

Qarsoq hashimik 49 grammimik politiit taassuma inigisaani 2015-imi oktobarimi nassaarisaanik tuniniaaqqinniarsimasutut eqqartuussaanikuuvoq. Sapaatip-akunnerani pineqaatissinneqarsimasunut inissiisarfimmiittussanngortinneqarneranik eqqartuussut inerneqarpoq, suliarli suliareqqitassanngortinneqarluni.

Suliaq Nunatta Eqqartuussisuuneqarfianit 2019-imi oktobarimi suliarineqarpoq, tassanilu haship tuniniarneqaqqinnissaanut uppernarsarneqarsinnaatinneqanngilaq. Eqqartuussut Qarsoq Høegh-Damip akiligassinneqarneranik inerneqarpoq.

Taamaakkaluartorli Naleqqap siulittaasuata, Pele Brobergip Qarsoq Høegh-Damip Naleqqap allaffeqarfianut uteqqinnera nuannaarutigaa.

- Pikkoriffeqarmat atorfinitsinnikuuarput aammalu siusinnerusukkut atorfeqarnikuugami Naleqqami, taamaammat tatiginassusaa uagutsinnut tassani apeqqusinngiivillugu atorfinitsinnikuuarput atorfilittatut, Broberg KNR-imut oqarpoq.

Siumumit tunuartoq

Qarsoq Høegh-Dam Siumup Nuummi immikkoortortaqarfiani siulittaasussatut siorna apriilip 28-ani toqqarneqarpoq. Ukiorli ataaseq qaangiuttoq – tassa ukioq manna maajip 30-ani – illoqarfiit pingaarnersaanni immikkoortortaqarfimmi siulittaasutut tunuarluni Siumumilu ukiuni 14-ini ilaasortaareerluni tunuarluni – Facebookikkut quppernermini nalunaarutigaa.

- Inuutillunga, partiimik ataasiinnarmik ilaasortaaffeqarnikuuvunga, tassalu Siumut, taanna oqarpoq.

Siumumi ilaasortaannikuuvutit, massakkullu Naleqqami sulillutit. Arlaannik aporaaffeqarsinnaava, politikkikkut allatut isumaqarneq?

- Taana naluara qanoq inissinnerit, kisianni ilaasortaaffeqanngitsoq tassaasussaanngilaq isummamik immaqa aalajangersimasumut pitusimannginneq.

Aamma atuarukSiumumi tusaamaneqarluartoq immikkoortortaqarfimmit tunuartoq

Pele Borbergillu isumaqatigaa.

- Soorunami ataasiinnarmik partiimik ilasortaaffeqarnikuunera uagut aamma ataqqilluinnarparput, nalunngilluinnarparpullu aamma partiimit tassani aninikuunermini, aninikuunngikkaluaruniluunniit piginnaasai atorluarsinnaassagigut Naleqqami, Naleqqami siulittaasoq oqarpoq.

Misiliummik sulinini naammassinngikkaa

Qarsoq Høegh-Dam maaji 2023-imi Siumumi siunnersortitut qaammatini pingasuni sulereerluni suleqatigiinneq unitsinneqartoq, Siumut allattaaneranit Ole Aggo Markussenimit nalunaarutigineqarpoq.

Pele Broberg tamanna pissutigalugu Qarsoq Høegh-Damip Naleqqami qanoq sivisutigisumik suleqatiginissaa naatsorsuutigaasiuk?

- Tassa qulakkeerinnittoqarsinnaanngilaq inuit qanoq sulissanersut, kisianni naatsorsuutigilluinnarpara Qarsoq Høegh-Dam maannamut isumaqatigiissut malillugu atorfeqarumaartoq, Pele Broberg oqarpoq.

Qanoq sivisutigisumik isumaqatigiissuteqarsimanerlutik oqaatigerusunngilaa.

Qarsoq Høegh-Dam Aki-Matilda Høegh-Damip Siumumeersup Folketingimut ilaasortap qatanngutigaa. Taanna Siumumi siulittaasussatut siorna sassarpoq, toqqagaananili.