Pinnguartarfiusimasoq biilinut qimaannakkanut eqqaavinngorpoq
Nuummi illoqarfiup immikkoortortaani Nuussuarmi blokkit marluk akornanni biilit 15-init missaaniittut piginnittuminnit qimaannarneqarsimapput.
Kommmuneqarfiup nittartagaani biilit pingasut nalunaarsorsimasut piginnittussarsiuunneqarput.
Tamannalu takornartaanngilaq. Kommuneqarfik Sermersuup nittartagaani Nuup illoqarfiani illoqarfiullu immikkoortortaaani biilit 63-it normoqanngitsut, angallatit 36-it containerillu 15-init inuttassarsiuunneqarput. Ilisimaneqanngilaq taakku qanoq sivisutigisumik uninngatiinnarneqarsimanersut.
Ivalo Møller Lange Nuummi illoqarfiup immikkoortortaani Nuussuarmi najugaqarpoq biilerpassuarnullu qimaannakkanut isikkiveqarluni. Najugaqarfimmi eqqaani meeqqat pinnguartartut ernummatigai.
-Avaanngunarpoq, isikkivilunnaqaaq, taavalu aamma meeqqanik pinnguartoqartoq ajutoortoqartoq isigerusunnanngeqaaq, naammattuuerusunnanngeqaaq. Taamaammat aamma angajoqqaat taakaniissanngitsoq oqaluuttassagaat neriuppunga, igalaaminernik ulikkaartarami.
Pinnguartarfeqarsimagaluarpoq, nungullarmalli aserfallallunilu ingitserneqarpoq, maanna tassa biilinut qimaannakkanut eqqaavinngorpoq.
-Sivisuumik biilerpassuaqarsimanngilaq. Meeqqat taakani pinnguarlutik biilit aserortilerpaat. Piffissamili kingullermi biilit qimaannakkat amerleriarujussuarput Ivalo Møller Lange oqaluttuarpoq.
Piginnittunut kinguneqartitsisoqanngilaq
Justus Hansen, Demokraatit, Kommuneqarfik Sermersuumi kommunalbestyrelsemi ilaasortaavoq illoqarfinnilu ineriartornermut ataatsimiititaliami siulittaasuulluni. Kommunimi illoqarfinni allani periutsit ajornartorsiutaasumut aaqqiissutaasinnaasutut qiviarneqarsinnaasut isumaqarpoq.
-Tasiilami illoqarfinnilu allani biilinut piginnittunut periarfissiisarpugut akiligassiisarnata. Piginnittut nammineq biilini imerpalasunik batteriinillu piiaasarput. Taava biilitik umiarsualivimmukaassinnaasarpaat umiarsuarnullu eqqagassanik aallertunut tunniussinnaasarlugit.
Aaqqiissuteqarnissamut kommuni iliuuseqalereersoq Justus Hansen isumaqarpoq.
-Iliuuseqarpugummi, tassa biilinut allagartamik nivinngaasarpugut, tassanilu erseqqissaalluta qaammatit pingasut qaangiutinnginnerani biilit qimaannakkat nammineq akilikkamik peerneqassasut. Tamassumalu saniatigut aamma inissiiffissaannik ikiussallutigit, tamannali ajornartorujussuuvoq, tassami biiliminnik qimanniinnartut nassaariuminaatsupilussuupput sunnguamilluunniillu akileerusussuseqarnatik akiliisussaatitaanerminnilluunniit paasinnissuseqanngilluinnarlutik, tassa tamanna sulianitsinni ajornartorsiuutit ilagivaat.
Pissutsit pillugit Justus Hansenip nassuiaataanut Ivalo Møller Lange naammagisimaarininngilaq.
KNR-ip nutaarsiassaqartitsiviata Justus Hansenip nassuiaataanut Ivalo Møller Lange oqaaseqateqartippaa:
-Ikkappallaaqaaq, ilisimavarput suli ajortikkiartuinnartoq, batteriilluunniit piiaraluarukkit suli igalaaminerpassuaqarpoq, tassa mingutsitsineq piuinnassaaq, uffa inuppassuit inuuffigisaata qeqqannguaniittoq, meerarpassuit pinnguartarfigisaanni.
